ന്യൂഡല്‍ഹി: ഇന്ത്യ ഒരു പടി വച്ചാല്‍ പാകിസ്താന്‍ രണ്ടു പടി മുന്‍പോട്ടു വയ്ക്കുമെന്ന പ്രസ്താവനയ്ക്ക് മറുപടിയുമായി ഇന്ത്യന്‍ കരസേനാ മേധാവി ജനറല്‍ ബിപിന്‍ റാവത്ത് രംഗത്ത്. തീവ്രവാദവും ചര്‍ച്ചയും ഒന്നിച്ചുപോവില്ലെന്നും അദ്ദേഹം വ്യക്തമാക്കി.

''അവര്‍ പറയുന്നു, നിങ്ങള്‍ ഒരു ചുവടു വയ്ക്കുക, ഞങ്ങള്‍ രണ്ടുചുവടു വയ്ക്കും. ആ പറയുന്നതില്‍ വൈരുദ്ധ്യമുണ്ട്. അവരുടെ ഭാഗത്തുനിന്നുള്ള ഒരു ചുവട് പോസിറ്റീവ് ആവണം. അത് ഗ്രൗണ്ടില്‍ പ്രതിഫലിക്കുന്നുണ്ടോയെന്ന് നോക്കാം. അതുവരെ നമ്മുടെ രാജ്യത്തിന് വ്യക്തമായ ഒരു നയമുണ്ട്- തീവ്രവാദവും ചര്‍ച്ചയും ഒന്നിച്ചുകൊണ്ടുപോകാനാവില്ല''- ബിപിന്‍ റാവത്ത് പറഞ്ഞു.

കര്‍താര്‍പൂര്‍ സൗഹൃദ ഇടനാഴി തുറന്നതിനു പിന്നാലെയാണ് ഇരുരാജ്യങ്ങളും തമ്മില്‍ വാഗ്വാദങ്ങള്‍ വീണ്ടും സജീവമായത്. പാകിസ്താനില്‍ നടക്കുന്ന സാര്‍ക്ക് ഉച്ചകോടിക്ക് ഇന്ത്യ പങ്കെടുക്കില്ലെന്നും വ്യക്തമാക്കിയിട്ടുണ്ട്. കര്‍താര്‍പൂര്‍ ഇടനാഴിക്ക് ചര്‍ച്ചയുമായി ബന്ധമില്ലെന്ന് വിദേശകാര്യ മന്ത്രി സുഷമാ സ്വരാജും വ്യക്തമാക്കിയിരുന്നു.