കണ്ണൂര്‍: കാട്ടാമ്പള്ളി സ്റ്റെപ്പ് റോഡില്‍ ബിവറേജ് ഔട്ട്‌ലെറ്റ് തുടങ്ങാനുള്ള നീക്കത്തിനെതിരേ യു.ഡി.എഫ് നാറാത്ത് പഞ്ചായത്ത് കമ്മിറ്റി നടത്തുന്ന അനിശ്ചിതകാല സമരം നാലുദിവസം പിന്നിട്ടു.
സ്റ്റെപ്പ്‌റോഡിലെ ബസ്‌സ്റ്റോപ്പിനടുത്തു തന്നെയുള്ള കെട്ടിടത്തിലാണ് ബിവറേജ് ഔട്ട്‌ലെറ്റ് തുടങ്ങാന്‍ രഹസ്യ നീക്കം തുടങ്ങിയത്. പുതിയതെരു ഹൈവേയിലുണ്ടായിരുന്ന മദ്യശാലയാണ് ഇവിടേക്ക് മാറ്റാന്‍ ശ്രമം നടക്കുന്നത്. ബിവറേജ് ഔട്ട്‌ലെറ്റ് തുടങ്ങുന്നതിനായി കണ്ടെത്തിയ കെട്ടിടത്തില്‍ എക്‌സൈസ് വകുപ്പ് അധികൃര്‍ പരിശോധനയും നടത്തിയിരുന്നു.
കണ്ണൂര്‍, മയ്യില്‍, കണ്ണാടിപ്പറമ്പ് തുടങ്ങിയ ഭാഗങ്ങളിലേക്കുള്ള യാത്രക്കാര്‍ ബസ് കാത്തുനില്‍ക്കുന്ന സ്റ്റെപ്പ്‌റോഡ് ജങ്ഷനിലെ സ്റ്റോപ്പിനടുത്തു തന്നെയാണ് മദ്യശാല തുടങ്ങാന്‍ നീക്കം നടത്തുന്നത്. കണ്ണാടിപ്പറമ്പ് ഹയര്‍ സെക്കന്‍ഡറി സ്‌കൂള്‍, ഹസനാത്ത് ഇംഗ്ലീഷ് ഹൈസ്‌കൂള്‍, മയ്യില്‍ ഹയര്‍ സെക്കന്‍ഡറി സ്‌കൂള്‍ എന്നിവിടങ്ങളിലേക്ക് പോകുന്ന വിദ്യാര്‍ഥികളും ബസ് കാത്തുനില്‍ക്കുന്നത് ഇവിടെയാണ്.
മദ്യശാല ഇവിടെ വന്നാല്‍ മദ്യപരുടെ വിഹാരകേന്ദ്രമാകും. സ്ത്രീകള്‍ക്കും കുട്ടികള്‍ക്കും ഇവിടെ ഇറങ്ങാന്‍പോലും പറ്റാത്ത അവസ്ഥയാകും. വിദ്യാഭ്യാസ സ്ഥാപനങ്ങളും ആസ്പത്രികളും മറ്റുമുള്ള മേഖലയില്‍ ബിവറേജ് ഔട്ട്‌ലെറ്റ് തുടങ്ങാന്‍ അനുവദിക്കില്ലെന്ന ഉറച്ച തീരുമാനത്തിലാണ് നാട്ടുകാര്‍. അനിശ്ചിതകാല സമരത്തിന് ഐക്യദാര്‍ഢ്യം പ്രഖ്യാപിച്ച് കണ്ണാടിപ്പറമ്പ് ദാറുല്‍ ഹസനാത്ത് ഇംഗ്ലീഷ് ഹൈസ്‌കൂള്‍ അധ്യാപകര്‍, രക്ഷിതാക്കള്‍, മാനേജ്‌മെന്റ് ഭാരവാഹികള്‍ എന്നിവര്‍ സമരപ്പന്തലിലെത്തി. കബീര്‍ കണ്ണാടിപ്പറമ്പ്, ആദില്‍ എടയന്നൂര്‍, രജിത്ത് നാറാത്ത്, പി.വി അബ്ദുല്ല, കെ.പി അബൂബക്കര്‍ ഹാജി, പി.കെ ഹംസ,സി.പി
മായന്‍, സ്‌കൂള്‍ പി.ടി.എ പ്രസിഡന്റ് മുഹമ്മദലി, റാഷിദ് വാഫി സംസാരിച്ചു.