തലശ്ശേരി: തകര്‍ന്ന ലോഗന്‍സ് റോഡിന്റെ മുഖം മിനുക്കാന്‍ തലശ്ശേരി ട്രാഫിക് പൊലിസും നഗരസഭ കണ്ടിജന്റ് ജീവനക്കാരും രംഗത്തിറങ്ങിയതോടെ ദിവസവും യാത്രക്കാര്‍ അനുഭവിക്കുന്ന ദുരിതത്തിന് താല്‍ക്കാലിക പരിഹാരമായി. ട്രാഫിക് സ്റ്റേഷന്‍ മുതല്‍ പാരീസ് ഹോട്ടല്‍ കോര്‍ണര്‍ വരെയുള്ള ഭാഗത്തെ കുണ്ടും കുഴികളിലും താര്‍ മിശ്രിതം നിറച്ചായിരുന്നു അറ്റകുറ്റപ്പണി. മഴ ആരംഭിച്ചതു മുതല്‍ റോഡിന്റെ മിക്ക ഭാഗങ്ങളും പൊട്ടിത്തകര്‍ന്നിരുന്നു. നഗരത്തിലെ വണ്‍വേ റോഡിന്റെ ശോച്യാവസ്ഥ കാരണം സദാസമയവും ഗതാഗത കുരുക്ക് അനുഭവപ്പെട്ടത് ട്രാഫിക് പൊലിസിന് തീരാ തലവേദനയായിരുന്നു. അറ്റകുറ്റപ്പണിക്കായി പൊതുമരാമത്ത് അറച്ചുനിന്നതോടെ ട്രാഫിക് പൊലിസും നഗരസഭയും കര്‍മനിരതരായി.