പുലാമന്തോള്‍: ടൗണിലെ കെട്ടിടത്തിലേക്ക് നിയന്ത്രണം വിട്ട ഇന്നോവ കാര്‍ പാഞ്ഞുകയറി. കഴിഞ്ഞ ദിവസം പുലര്‍ച്ചെ ഒരു മണിയോടെയാണ് അപകടം. തൃശൂര്‍ ഭാഗത്ത് നിന്നും പെരിന്തല്‍മണ്ണ ഭാഗത്തേക്ക് വരികയായിരുന്ന കാറാണ് അപകടത്തില്‍പ്പെട്ടത്.
പെരിന്തല്‍മണ്ണ സ്വദേശിയായ ഡോക്ടറും, വെള്ളില സ്വദേശിയായ ഡ്രൈവറും മാത്രമാണ് കാറിലുണ്ടായിരുന്നത്. ടൗണിലെത്തിയ കാര്‍ നിയന്ത്രണം വിട്ടതോടെ റോഡരികിലെ കടയിലേക്ക് പാഞ്ഞുകയറുകയായിരുന്നു. വാഹനത്തിന്റെ പകുതിയോളം വരുന്ന ഭാഗം കടക്കകത്തായി. ക്രെയിന്‍ ഉപയോഗിച്ചാണ് വാഹനം നീക്കം ചെയ്തത്.
ഇടിയുടെ ആഘാതത്തില്‍ വാഹനത്തിന്റെ മുന്‍വശവും, ഒരു മൊബൈല്‍ ഷോപ്പും, ആയുര്‍വേദിക് മരുന്ന് ശാലയും തകര്‍ന്നിട്ടുണ്ട്. ഡ്രൈവര്‍ ഉറങ്ങിയതാകാം അപകടകാരണമെന്നാണ് പ്രാഥമിക നിഗമനം.
ആര്‍ക്കും പരുക്കില്ല.