കൊല്ലം: അഷ്ടമുടിക്കായലിലെ വിനോദസഞ്ചാര സാധ്യതകള്‍ കൂടുതല്‍ പ്രയോജനപ്പെടുത്തുന്നതിനുള്ള പ്രവര്‍ത്തനങ്ങളുടെ ഭാഗമായി ജില്ലാ ടൂറിസം പ്രമോഷന്‍ കൗണ്‍സില്‍ സാമ്പ്രാണിക്കോടിയില്‍ ബോട്ടിങ് കേന്ദ്രം തുറന്നു. എം. മുകേഷ് എം.എല്‍.എ ഉദ്ഘാടനം ചെയ്തു. തൃക്കരുവ ഗ്രാമ പഞ്ചായത്ത് പ്രസിഡന്റ് കെ. ചന്ദ്രശേഖരപിള്ള അധ്യക്ഷനായി.
പകുതി ദിവസത്തേക്കുള്ള രണ്ടു പാക്കേജുകള്‍, അര മണിക്കൂര്‍ വീതമുള്ള കണ്ടല്‍ഗ്രാമ സന്ദര്‍ശനങ്ങള്‍ എന്നിവയാണു പദ്ധതിയില്‍ ഉള്‍പ്പെടുത്തിയിട്ടുള്ളത്. ഒരു സ്പീഡ് ബോട്ടും ഒരു വള്ളവും ഇതിനായി സജ്ജമാക്കിയിട്ടുണ്ട്.
ഡി.ടി.പി.സി എക്‌സിക്യുട്ടീവ് കമ്മിറ്റി അംഗങ്ങളായ എക്‌സ്. ഏണസ്റ്റ്, അഡ്വ. ജി. മുരളീധരന്‍, ടി.ആര്‍ ശങ്കരപിളള, കെ. ശ്രീകുമാര്‍, തൃക്കരുവ ഗ്രാമ പഞ്ചായത്ത് സ്റ്റാന്റിങ് കമ്മിറ്റി അധ്യക്ഷരായ എം. അനില്‍കുമാര്‍, കെ. തങ്കന്‍, ഡി.ടി.പി.സി സെക്രട്ടറി സി. സന്തോഷ്‌കുമാര്‍ സംബന്ധിച്ചു. ഈ കേന്ദ്രത്തിലെ ബോട്ടിങ്ങിന്റെ വിശദാംശങ്ങള്‍ 9633323719 എന്ന നമ്പരില്‍ ലഭിക്കും.