ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്റര്‍ സിറ്റിക്ക് ഇന്ന് ജീവന്‍മരണ പോരാട്ടം. ഇന്ന് രാത്രി 11 ന് ചെല്‍സിയേയാണ് മാഞ്ചസ്റ്റര്‍ സിറ്റി നേരിടുന്നത്.
ലംപാര്‍ഡിന്റെ വരവോടുകൂടി ശക്തമായ ചെല്‍സിയെ തോല്‍പ്പിക്കണമെങ്കില്‍ സിറ്റിക്ക് അല്‍പം വിയര്‍ക്കേണ്ടി വരും. ഇന്നത്തെ മത്സരത്തിലെ സമനില പോലും സിറ്റിക്ക് താങ്ങാന്‍ കഴിയില്ല. കാരണം ഒന്നാം സ്ഥാനത്തുള്ള ലിവര്‍പൂളുമായി എട്ട് പോയിന്റിന്റെ വ്യത്യാസം ഇപ്പോഴുണ്ട്. ഒരു പക്ഷെ സിറ്റിക്ക് സമനിലയോ തോല്‍വിയോ പിണയുകയാണെങ്കില്‍ ലിവര്‍പൂള്‍ പോയിന്റ് പട്ടികയില്‍ മികച്ച നേട്ടമുണ്ടാക്കും. 25 പോയിന്റുമായി മാഞ്ചസ്റ്റര്‍ സിറ്റി പട്ടികയില്‍ നാലാം സ്ഥാനത്താണ് ഇപ്പോഴുള്ളത്. രണ്ടാം സ്ഥാനത്തുള്ള ലെസ്റ്റര്‍ സിറ്റിക്കും മൂന്നാം സ്ഥാനത്തുള്ള ചെല്‍സിക്കും 26 പോയിന്റ് വീതമാണുള്ളത്.
ചെല്‍സിയും ജയത്തിന് വേണ്ടി പോരാടുമ്പോള്‍ ഇന്ന് മികച്ചൊരു മത്സരം പ്രതീക്ഷിക്കാം. രാത്രി 8.30ന് നടക്കുന്ന മറ്റൊരു മത്സരത്തില്‍ ലിവര്‍പൂള്‍ ക്രിസ്റ്റല്‍ പാലസിനെ നേരിടും. പരുക്കേറ്റ സലാഹ് ടീമില്‍ തിരിച്ചെത്തിയിട്ടുണ്ട്. വൈകിട്ട് 6ന് പുതിയ പരിശീലകന്‍ മൗറീഞ്ഞോക്ക് കീഴില്‍ ടോട്ടനം ഇന്ന് വെസ്റ്റ് ഹാമിനെ നേരിടും. രാത്രി 8.30ന് നടക്കുന്ന മത്സരത്തില്‍ ആഴ്‌സനല്‍ സതാംപ്ടണെ നേരിടും.
ഇതേ സമയത്ത് നടക്കുന്ന മത്സരങ്ങളില്‍ ബ്രൈറ്റണ്‍ ലെസ്റ്റര്‍ സിറ്റിയേയും വാട്‌ഫോര്‍ഡ് ബേണ്‍ലിയേയും എവര്‍ട്ടന്‍ നോര്‍വിച്ച് സിറ്റിയേയും ബേണ്‍മൗത്ത് വോള്‍വ്‌സിനെയും നേരിടും.