തേഞ്ഞിപ്പലം: ഗവേഷണത്തിനാണ് സര്‍വകലാശാലകള്‍ മുന്‍തൂക്കം നല്‍കേണ്ടതെന്ന്്് വിദ്യാഭ്യാസ മന്ത്രി പ്രൊഫ: സി.രവീന്ദ്രനാഥ്. കാലിക്കറ്റ്് സര്‍വകലാശാല സുവര്‍ണ ജൂബിലി ആഘോഷ പരിപാടിയില്‍ അധ്യക്ഷ്യനായി സംസാരിക്കുകയായിരുന്നു അദ്ദേഹം. 

സ്‌കൂള്‍ തലം മുതലുളള അറിവുകള്‍ ഗവേഷണത്തിലൂടെ രൂപപ്പെടുത്തണം. സര്‍വകലാശാലകള്‍ പരീക്ഷാനടത്തിപ്പിലും മൂല്യനിര്‍ണയത്തിലും ശ്രദ്ധ കേന്ദ്രീകരിക്കുന്നതിനൊപ്പം ഗവേഷണ മേഖലയ്ക്കും ഊന്നല്‍ നല്‍കണം. സര്‍വ്വകലാശാലകളില്‍ കെട്ടിടങ്ങളുടെ വളര്‍ച്ച മാത്രമല്ല ആശയങ്ങളുടെ വളര്‍ച്ച കൂടി ഉണ്ടാകണം പ്രൊഫ: സി. രവീന്ദ്രനാഥ് പറഞ്ഞു. കാലിക്കറ്റ് സര്‍വകലാശാല സുവര്‍ണ ജൂബിലി ആഘോഷ വേളയില്‍ അക്കാദമിക് മാസ്റ്റര്‍ പ്ലാന്‍ തയ്യാറാക്കാന്‍ തീരുമാനിച്ചത് ശ്രദ്ധേയമായ കാര്യമാണ്. സംസ്ഥാനത്തു തന്നെ ഒരു സര്‍വ്വകലാശാല അക്കാദമിക് മാസ്റ്റര്‍ പ്ലാന്‍ തയ്യാറാക്കുന്നത് ഇതാദ്യമാണെന്നും മന്ത്രി പറഞ്ഞു.