വാടാനപ്പള്ളി : കേരളത്തിലെ  പെണ്‍കുട്ടികള്‍ക്ക് ഉന്നത വിദ്യാഭ്യാസം നല്‍കാന്‍ മാതാപിതാക്കള്‍ തയ്യാറാകണമെന്നും എക്‌സൈസ് കമ്മിഷണര്‍ ഋഷിരാജ്‌സിങ് അഭിപ്രായപ്പെട്ടു. ശിഹാബ് തങ്ങള്‍ റിലീഫ് സെല്‍ തളിക്കുളത്ത് സംഘടിപ്പിച്ച അക്ഷരാദരം പരിപാടി കാര്‍ത്തിക തിയ്യറ്ററില്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
 എസ്.എസ്.എല്‍.സി കഴിഞ്ഞ പെണ്‍കുട്ടികളില്‍ അറുപത് ശതമാനം പേരും ഉന്നത വിദ്യാഭ്യാസം നേടാതെ പഠനം അവസാനിപ്പിക്കുകയാണന്നും മറ്റ് സംസ്ഥാനങ്ങളെ പോലെയല്ല കേരളമെന്നും ഉന്നത വിദ്യാഭ്യാസം നേടാന്‍  കേരളത്തിലെ പെണ്‍കുട്ടികള്‍ തയ്യാറാകണം. സ്ത്രീവിദ്യാഭ്യാസത്തിന് എന്നും പ്രചോദനം നല്‍കിയ മഹത് വ്യക്തിത്വമായിരുന്നു മുഹമ്മദലി ശിഹാബ് തങ്ങളെന്നും  ഋഷിരാജ്‌സിങ് പറഞ്ഞു.
ആണ്‍കുട്ടികള്‍ വിദ്യ നേടിയാല്‍ ഒരാള്‍ക്ക് മാത്രമെ അറിവ് ലഭിക്കുകയുള്ളു. എന്നാല്‍ പെണ്‍കുട്ടികള്‍ അറിവ് നേടിയാല്‍ അത് ഒരു കുടുംബം മുഴുവന്‍ അറിവ് നേടിയതിന് തുല്യമാകും. തീരദേശമേഖലയിലെ കഞ്ചാവ് മയക്കുമരുന്ന് ലോബിയെ അമര്‍ച്ച ചെയ്യാന്‍ താനും എക്‌സൈസ് ഡിപ്പാര്‍ട്ടുമെന്റും എന്നും പ്രതിജ്ഞാബദ്ധമാണ്.
സംസ്ഥാനത്തെ വിദ്യാലയങ്ങള്‍ക്ക് അടുത്തുള്ള എല്ലാ പാന്‍ കടകളും നീക്കം ചെയ്ത് കഴിഞ്ഞെന്നും, ലഹരി ഉല്‍പ്പന്നങ്ങളുടെ വിപണനം കണ്ടെത്താന്‍ എല്ലാ വിദ്യാലങ്ങളിലും പരാതി പെട്ടികള്‍ സ്ഥാപിക്കുമെന്നും അദ്ദേഹം പറഞ്ഞു.
ശിഹാബ് തങ്ങള്‍ റിലീഫ് സെല്‍ ചെയര്‍മാന്‍ കെ.എ ഹാറൂണ്‍റഷീദ് അധ്യക്ഷനായി. മഹാത്മാഗാന്ധി യൂനിവേഴ്‌സിറ്റി പ്രൊഫ: വൈസ് ചാന്‍സലര്‍ ഡോ: ഷീന ഷുക്കൂര്‍ പുരസ്‌കാരം വിതരണം ചെയ്തു.
ടി.എന്‍. പ്രതാപന്‍ മുഖ്യപ്രഭാഷണം നടത്തി.  ലെമര്‍ പബ്ലിക് സ്‌കൂള്‍ ചെയര്‍മാന്‍ എം.എ. ഷൗക്കത്തലി, ജില്ലാ പ്രോസിക്യൂട്ടര്‍ അഡ്വ: കെ.ബി. രണേന്ദ്രനാഥ്, ജില്ലാ സഹകരണ ബാങ്ക് പ്രസിഡന്റ് എം.കെ. അബ്ദുല്‍ സലാം, വലപ്പാട് സര്‍ക്കിള്‍ ഇന്‍സ്‌പെക്ടര്‍ ടി.ആര്‍. സന്തോഷ്, തൃപ്രയാര്‍ ദേവസ്വം മാനേജര്‍ വി.എന്‍. സ്വപ്ന, ഗിന്നസ് റെക്കോര്‍ഡര്‍ മുരളിനാരായണന്‍, ഗിന്നസ് റെക്കോര്‍ഡര്‍ സത്താര്‍ ആദൂര്‍, എം.എസ്.എഫ് സംസ്ഥാന സെക്രട്ടറി മുഹമ്മദ് അസറുദ്ദീന്‍, മദര്‍ ആര്‍ട്‌സ് ആന്റ് സയന്‍സ് പ്രിന്‍സിപ്പല്‍ ആര്‍.യു. അബ്ദുല്‍ സലീം എന്നിവര്‍ പങ്കെടുത്തു.