മാവൂര്‍: മാവൂരില്‍ മഞ്ഞപ്പിത്തം റിപ്പോര്‍ട്ട് ചെയ്ത സാഹചര്യത്തില്‍ ആരോഗ്യപ്രവര്‍ത്തകര്‍ ജാഗ്രതയില്‍. മാവൂര്‍ ജി.എം.യു.പിയിലെ അഞ്ച് വിദ്യാര്‍ഥികള്‍ക്കും കച്ചേരിക്കുന്ന് ഭാഗങ്ങളിലെ മൂന്ന് പേര്‍ക്കുമാണ് കഴിഞ്ഞദിവസം മഞ്ഞപ്പിത്തം റിപ്പോര്‍ട്ട് ചെയ്തത്. പകര്‍ച്ചവ്യാധി പ്രതിരോധത്തിന്റെ ഭാഗമായി മാവൂര്‍ ഗ്രാമപഞ്ചായത്തിലെ ഹോട്ടല്‍, കൂള്‍ബാര്‍, തട്ടുകടകള്‍, പെട്ടി കടകള്‍ എന്നിവിടങ്ങളില്‍ ആരോഗ്യവകുപ്പ് മിന്നല്‍ പരിശോധന നടത്തി.
ഉപ്പിലിട്ട പഴവര്‍ഗങ്ങള്‍, പച്ചക്കറികള്‍ എന്നിവ പിടിച്ചെടുത്ത് നശിപ്പിച്ചു. ആരോഗ്യത്തിന് ഹാനികരമാകുന്ന രീതിയില്‍ പ്രവര്‍ത്തിച്ചാല്‍ കടകള്‍ അടപ്പിക്കുന്നതുള്‍പ്പെടെയുള്ള നടപടികളിലേക്ക് നീങ്ങുമെന്ന് മുന്നറിയിപ്പ് നല്‍കി. ഇനിയൊരറിയിപ്പുണ്ടാകുന്നതു വരെ മാവൂര്‍ പഞ്ചായത്തില്‍ ഉപ്പിലിട്ട പഴം, പച്ചക്കറി എന്നിവ വില്‍പന നടത്താന്‍ പാടില്ലെന്ന് അധികൃതര്‍ അറിയിച്ചു. സ്‌കൂള്‍ വിദ്യാര്‍ഥികളെ ലക്ഷ്യമിട്ട് വില്‍പന നടത്തുന്ന നിലവാരം കുറഞ്ഞ മിഠായി, ഉപ്പിലിട്ടവ, സിപ്പപ്പ്, സംഭാരം എന്നിവയും നിരോധിച്ചിട്ടുണ്ട്. പരിശോധനയില്‍ ഹെല്‍ത്ത് ഇന്‍സ്‌പെക്ടര്‍ അബ്ദുല്‍മജീദ്, ജൂനിയര്‍ ഹെല്‍ത്ത് ഇന്‍സ്‌പെക്ടര്‍മാരായ പ്രവീണ്‍ കുമാര്‍, ആരിഫ്, അയ്യൂബ് എന്നിവരും പബ്ലിക് ഹെല്‍ത്ത് നഴ്‌സ് മര്‍ലിന്‍ ക്ലീറ്റസും പങ്കെടുത്തു.