വാഷിങ്ടണ്‍: പോഷകാഹാരക്കുറവു മൂലം 18 മാസം പ്രായമുള്ള കുഞ്ഞ് മരിച്ച സംഭവത്തില്‍ മാതാപിതാക്കളെ ഫ്‌ളോറിഡ പൊലിസ് അറസ്റ്റ് ചെയ്തു. കൊലക്കുറ്റത്തിനും കുഞ്ഞിനെ അവഗണിച്ചതിനുമാണ് കേസ്.
സെപ്റ്റംബര്‍ 27നാണ് കേസിനാസ്പദമായ സംഭവം. പുലര്‍ച്ചെ നാലിന് കുഞ്ഞ് ദീര്‍ഘശ്വാസമെടുക്കുന്നതു കണ്ടിട്ടും ആശുപത്രിയിലെത്തിക്കാതെ കിടന്നുറങ്ങുകയായിരുന്നു അമ്മ ഷീല ഒ ലെറെയും അച്ഛന്‍ സീന്‍ ഒ ലെറെയും. പിന്നീട് വൈകി മകന്‍ ശ്വസിക്കുന്നില്ലെന്ന് അറിയിച്ചതനുസരിച്ച് ആരോഗ്യവിഭാഗം വീട്ടിലെത്തുമ്പോള്‍ മകന്‍ മരിച്ചിരുന്നു. പച്ചക്കറികളും പഴങ്ങളും മാത്രം കഴിക്കുന്ന ആ കുടുംബം കുഞ്ഞിന് മുലപ്പാല്‍ മാത്രമേ കൊടുത്തിരുന്നുള്ളൂ. അതും വല്ലപ്പോഴും. പ്രസവിച്ചതും വീട്ടില്‍ വച്ചായിരുന്നു. ഒരിക്കല്‍ പോലും കുഞ്ഞിനെ ഡോക്ടറെ കാണിച്ചതുമില്ല. ആരോഗ്യപ്രവര്‍ത്തകര്‍ കുഞ്ഞിന്റെ മൃതദേഹം പരിശോധിച്ചപ്പോള്‍ നിര്‍ജലീകരണം അനുഭവിച്ചതായി മനസ്സിലായി. കാലും കൈയും ചീര്‍ത്തിരിക്കുന്നു. കരളിന് മൈക്രോസ്‌റ്റേറ്റോസിസ് രോഗവുമുണ്ടായിരുന്നു. ഇത് പോഷകാഹാരക്കുറവു മൂലമുണ്ടാവുന്നതാണ്.
ആറുമാസമായി രോഗംമൂലം കുഞ്ഞിന് ഒന്നും ഭക്ഷിക്കാന്‍ പറ്റാത്ത അവസ്ഥയായിരുന്നു. ഒ ലെറെയ്ക്ക് മൂന്നും അഞ്ചും വയസുള്ള രണ്ടു കുട്ടികള്‍ കൂടിയുണ്ടായിരുന്നു. അവരും പോഷകാഹാരക്കുറവ് അനുഭവിക്കുന്നതായും പൊലിസ് പറഞ്ഞു. രക്ഷിതാക്കള്‍ ജയിലിലായതോടെ കുട്ടികളെ ശിശുക്ഷേമ വിഭാഗം ഏറ്റെടുത്തിരിക്കുകയാണ്.