ജിദ്ദ: ഇന്ത്യയില്‍ നിന്ന് ഇതുവരെ 15,343 തീര്‍ഥാടകര്‍ വിശുദ്ധ നഗരങ്ങളില്‍ എത്തി. കഴിഞ്ഞ തിങ്കളാഴ്ചയാണ് ഇന്ത്യയില്‍ നിന്നുള്ള ഹജ്ജ് വിമാന സര്‍വിസ് ആരംഭിച്ചത്. അതേ സമയം കഴിഞ്ഞ നാലു ദിവസങ്ങളിലായി ഇന്ത്യന്‍ ഹജ്ജ് മിഷന്‍ വഴി പതിനായിരത്തിലധികം തീര്‍ഥാടകര്‍ മദീനയില്‍ എത്തി. പതിനഞ്ചും പതിനാറും വിമാനങ്ങളിലായി നാലായിരത്തിലധികം തീര്‍ഥാടകര്‍ ഓരോ ദിവസവും ഇപ്പോള്‍ മദീനയില്‍ എത്തുന്നുണ്ട്. നടപടിക്രമങ്ങള്‍ പൂര്‍ത്തിയാക്കി താമസിയാതെ തന്നെ തീര്‍ഥാടകര്‍ മദീനാ വിമാനത്താവളത്തിനു പുറത്തിറങ്ങുന്നുണ്ട്. ഓഗസ്റ്റ് എട്ടു വരെ ഇന്ത്യയില്‍ നിന്ന് മദീനയിലേക്കുള്ള ഹജ്ജ് വിമാന സര്‍വിസുകള്‍ തുടരും. ചൊവ്വാഴ്ച മുതല്‍ ഹാജിമാര്‍ മദീനയില്‍ നിന്ന് മക്കയിലേക്ക് പുറപ്പെട്ടും.
ഹറം പള്ളിക്കടുത്ത് മാര്‍ക്കസിയ ഏരിയയില്‍ താമസ സൗകര്യം ലഭിക്കാത്ത ഇന്ത്യയില്‍ നിന്നുള്ള തീര്‍ഥാടകര്‍ക്ക് 350 റിയാല്‍ വീതം മടക്കി നല്‍കും. അതിനിടെ ഇന്ത്യയില്‍ നിന്ന് സ്വകാര്യ ഗ്രൂപ്പുകള്‍ വഴിയുള്ള തീര്‍ഥാടകരും സഊദിയില്‍ എത്തി തുടങ്ങി. ജിദ്ദ വഴിയെത്തിയ സ്വകാര്യ ഗ്രൂപ്പുകളിലെ പല മലയാളി തീര്‍ഥാടകരും ഇപ്പോള്‍ മക്കയിലാണ് ഉള്ളത്. അതേസമയം ഇത്തവണ ഇന്ത്യയില്‍ നിന്നുള്ള ഹജ്ജ് സൗഹൃദ സംഘത്തെ വിദേശകാര്യ സഹമന്ത്രി എം.ജെ അക്ബര്‍ നയിക്കുമെന്ന് ഹജ്ജ് മിഷന്‍ അറിയിച്ചു.
ഇന്ത്യയിലെ ഏഴു വിമാനത്താവളങ്ങളില്‍ നിന്നാണ് നിലവില്‍ ഹജ്ജ് വിമാനങ്ങള്‍ സര്‍വിസ് നടത്തുന്നത്. ഡല്‍ഹിയില്‍ നിന്നാണ് കൂടുതല്‍ വിമാനങ്ങളുള്ളത്. പാകിസ്താന്‍, ഇന്തോനേഷ്യ തുടങ്ങിയ രാജ്യങ്ങളില്‍ നിന്നാണ് വിദേശ ഹാജിമാരുടെ ഒഴുക്ക് കൂടുതല്‍.