ന്യൂഡല്‍ഹി: മഹാരാഷ്ട്ര അട്ടിമറി ഇന്ന് പാര്‍ലമെന്റിന്റെ ഇരുസഭകളിലും സുപ്രധാന ചര്‍ച്ചാവിഷയമാകും. ലോക്‌സഭയിലും രാജ്യസഭയിലും കോണ്‍ഗ്രസും ശിവസേനയും എന്‍.സി.പിയും ചേര്‍ന്ന് വിഷയം ശക്തമായി ഉന്നയിക്കും. ഇടതു പാര്‍ട്ടികള്‍ ഉള്‍പ്പെടെയുള്ളവരും ഇക്കാര്യത്തില്‍ സര്‍ക്കാരിനെതിരായ നിലപാട് സ്വീകരിക്കും.
അര്‍ധരാത്രിയില്‍ മന്ത്രിസഭായോഗം ചേരാതെ രാഷ്ട്രപതി ഭരണം പിന്‍വലിച്ച നടപടിയും മഹാരാഷ്ട്ര ഗവര്‍ണറുടെ വിവേചനപരമായ നിലപാടും സഭയില്‍ പ്രതിപക്ഷം ഉയര്‍ത്തും. ഇരുസഭകളും ഇന്ന് ബഹളത്തില്‍ മുങ്ങാനാണ് സാധ്യത.
ലോക്‌സഭയില്‍ ശിവസേനയ്ക്ക് 18 അംഗങ്ങളാണുള്ളത്. യു.പി.എയ്ക്ക് 92 അംഗങ്ങളുണ്ട്. രാജ്യസഭയില്‍ ശിവസേനയ്ക്ക് മൂന്നംഗങ്ങളും യു.പി.എക്ക് 66 അംഗങ്ങളുമാണുള്ളത്.