ന്യൂഡല്‍ഹി: ജി.എസ്.ടിയെ വാനോളം പുകഴ്ത്തി പ്രധാനമന്ത്രിയുടെ മന്‍ കീ ബാത്ത്. ചരക്കുസേവന നികുതി നിലവില്‍ വന്നത് രാജ്യത്തിന്റെ സമ്പദ് വ്യവസ്ഥയ്ക്ക് ഗുണപരമായ വഴിത്തിരിവായെന്ന് മോദി പറഞ്ഞു. ജനങ്ങളില്‍ നിന്ന് താന്‍ അഭിപ്രായം തേടിയിരുന്നു. നല്ല രീതിയിലുള്ള അഭിപ്രായങ്ങളാണ് ലഭിക്കുന്നത്. ജി.എസ്.ടിയുടെ വിജയകരമായ നടത്തിപ്പ് വരും വര്‍ഷങ്ങളില്‍ വിവിധ രാജ്യങ്ങള്‍ പഠനവിഷയമാക്കുമെന്നും പ്രധാനമന്ത്രി ആത്മവിശ്വാസം പ്രകടിപ്പിച്ചു.

ജി.എസ്.ടി പ്രാബല്യത്തില്‍ വന്നതോടെ എല്ലാ വിഭാഗക്കാര്‍ക്കും പണ വിനിമയം സുഗമമായി. അഴിമതിക്കെതിരായ യുദ്ധമാണ് സര്‍ക്കാര്‍ പ്രഖ്യാപിക്കുന്നതെന്നും അദ്ദേഹം കൂട്ടിച്ചേര്‍ത്തു.

ഇംഗ്ലണ്ടില്‍ അടുത്തിടെ സമാപിച്ച വനിതാ ക്രിക്കറ്റ് ലോകകപ്പില്‍ ഫൈനലില്‍ കടന്ന വനിതാ ക്രിക്കറ്റ് ടീമിനെക്കുറിച്ചും അദ്ദേഹം വാചാലനായി. ടീം രാജ്യത്തിന്റെ അഭിമാനം വാനോളം ഉയര്‍ത്തി. എത്ര നന്നായി പ്രകടനം നടത്തിയാലും പരാജയപ്പെട്ടാല്‍ ടീമിനെ തള്ളിപ്പറയുക പതിവാണ്. എന്നാല്‍, ഇംഗഌിനോടേറ്റ പരാജയത്തിനു ശേഷവും കിക്കറ്റ് ടീമംഗങ്ങള്‍ക്ക് രാജ്യം നല്‍കിയ പിന്തുണയും സ്‌നേഹവും അഭിമാനാര്‍ഹമാണെന്നും അദ്ദേഹം പറഞ്ഞു. കിരീടം നേടാനായില്ലെങ്കിലും 125 കോടി ആളുകളുടെ മനസില്‍ ഇടം നേടാനായത് വലിയ കാര്യമാണെന്നും അദ്ദേഹം ചൂണ്ടിക്കാട്ടി.