ഭോപ്പാല്‍: മധ്യപ്രദേശ് മുന്‍ മുഖ്യമന്ത്രിയും മുതിര്‍ന്ന ബി.ജെ.പി നേതാവുമായ കൈലാഷ് ചന്ദ്ര ജോഷി അന്തരിച്ചു. 90 വയസായിരുന്നു. വാര്‍ധക്യസഹജമായ അസുഖത്തെ തുടര്‍ന്ന് ചികിത്സയില്‍ കഴിയവെ ഭോപ്പാലിലെ സ്വകാര്യ ആശുപത്രിയില്‍ വച്ചായിരുന്നു അന്ത്യം. ജനസംഘത്തിലൂടെ ബി.ജെ.പിയിലെത്തിയ ജോഷി, 1977 മുതല്‍ 1978 വരെയാണ് മധ്യപ്രദേശ് മുഖ്യമന്ത്രിയായത്. ജനതാ പാര്‍ട്ടിയിലിരിക്കെയാണ് അദ്ദേഹം സര്‍ക്കാര്‍ രൂപീകരിച്ചത്. 2004 മുതല്‍ 2014 വരെ ഭോപ്പാല്‍ ലോക്‌സഭാ മണ്ഡലത്തെ പ്രതിനിധീകരിച്ചു. 2000 മുതല്‍ 2004 വരെ രാജ്യസഭാംഗവുമായിരുന്നു. എട്ടുതവണ നിയമസഭാംഗവുമായിരുന്നിട്ടുണ്ട്. അന്ത്യകര്‍മങ്ങള്‍ ഇന്ന് ദേവാസ് ജില്ലയിലെ ജന്മനാടായ ഹത്പിപ്ലിയയില്‍ നടത്തും. ഏതാനും മാസങ്ങള്‍ക്ക് മുന്‍പാണ് ഭാര്യ മരിച്ചത്.