മാറഞ്ചേരി: അ@ണ്ടത്തോട് സര്‍വിസ് സഹകരണ ബാങ്ക് ഗോഡൗണില്‍ അരി തിരിമറി നടന്ന മാസം റേഷന്‍ വ്യാപാരികള്‍ നല്‍കിയ കണക്കുകള്‍ താലൂക്ക് സപ്ലൈ ഓഫിസിലെ ഉദ്യോഗസ്ഥര്‍ വ്യാപകമായി വെട്ടിത്തിരുത്തിയതായി പരാതി. മെയ് മാസത്തില്‍ റേഷന്‍ കടകള്‍വഴി വിതരണം നടത്തേണ്ട@ ലോഡ് കണക്കിന് അരിയും ഗോതമ്പുമാണ് ഗോഡൗണില്‍നിന്നു കാണാതായിരുന്നത്. ഗോഡൗണിനു കീഴിലുള്ള 29 റേഷന്‍ കടകളിലേക്കു ഭാഗികമായി അരിയും ഗോതമ്പും വിതരണം ചെയ്തിരുന്നു. ഭൂരിഭാഗം കടക്കാരും റേഷന്‍ വിതരണം മുടങ്ങാതിരിക്കാന്‍ കിട്ടിയ സാധനങ്ങള്‍ വരവുപിടിച്ചും ചിലര്‍ അല്ലാതെയും വിതരണം നടത്തുകയും ചെയ്തു. ഇത്തരത്തില്‍ വിതരണം നടത്തിയത് അരി തിരിമറി നടന്ന സമയത്ത് ജില്ലാ സപ്ലൈ ഓഫിസറുടെ നേതൃത്വത്തില്‍ മുഴുവന്‍ കടകളിലും നടത്തിയ പരിശോധനയില്‍ വ്യക്തമായിരുന്നു. ഈ കണക്കുകളാണ് വെട്ടിത്തിരുത്തിയിരിക്കുന്നത്. സ്ഥലംമാറിപ്പോയ അസി. സപ്ലൈ ഓഫിസറുടെ നിര്‍ദേശപ്രകാരമാണ് നടപടിയെന്നാണ് വിശദീകരണം. തിരിമറി നടത്തിയത് ഉദ്യോഗസ്ഥയാണെന്ന് അന്നുതന്നെ ബാങ്ക് അധികൃതര്‍ പറഞ്ഞിരുന്നു. ഇത്തരത്തിലുള്ള നടപടി അംഗീകരിക്കില്ലെന്നു കേരളാ സംസ്ഥാന റീട്ടെയില്‍ റേഷന്‍ ഡീലേഴ്‌സ് അസോസിയേഷന്‍ ജില്ലാ സെക്രട്ടറി കബീര്‍ അമ്പാരത്ത് പറഞ്ഞു.