തേഞ്ഞിപ്പലം: ചേളാരിയിലെ മൃഗാശുപത്രിയെ ചികിത്സിക്കാന്‍ അവസാനം യൂത്ത് ലീഗ് പ്രവര്‍ത്തകര്‍ മുന്നിട്ടിറങ്ങി. യൂത്ത് ലീഗ് ദിനാചരണത്തിന്റെ ഭാഗമായി തേഞ്ഞിപ്പലം പഞ്ചായത്ത് മുസ്‌ലിം യൂത്ത് ലീഗ് കമ്മിറ്റിയുടെ നേതൃത്വത്തിലാണ് തേഞ്ഞിപ്പലം മൃഗാരോഗ്യ കേന്ദ്രത്തില്‍ ശുചീകരണ, സേവന പ്രവൃത്തികള്‍ നടത്തിയത്. 

ആശുപത്രിയുടെ ശോചനീയാവസ്ഥ ഇന്നലെ സുപ്രഭാതം റിപ്പോര്‍ട്ട് ചെയ്തിരുന്നു. ആശുപത്രി മുറ്റം കുഴിയായി വെള്ളം കെട്ടില്‍ക്കുകയും ടെറസിന് മുകളില്‍ പുല്‍കാടുകള്‍ വളരുകയും ചെയ്ത നിലയിലായിരുന്നു. യൂത്ത് ലീഗ് പ്രവര്‍ത്തകര്‍ ആശുപത്രി മുറ്റത്തെ കുഴികള്‍ മണ്ണിട്ടുനികത്തുകയും കെട്ടിടത്തിന് മുകളിലെ പുല്‍കാടുകള്‍ നീക്കം ചെയ്യുകയും ചെയ്തു. മുകളില്‍ കെട്ടി നിന്ന മഴവെള്ളവും ചെളിയും കോരി ഒഴിവാക്കിയിട്ടുമുണ്ട്. ശുചീകരണ പ്രവൃത്തിയുടെ ഉദ്ഘാടനം ബ്ലോക്ക് പഞ്ചായത്ത് പ്രസിഡന്റ് കെ കലാം മാസ്റ്റര്‍ നിര്‍വ്വഹിച്ചു. കെ.ടി ജാഫര്‍ അധ്യക്ഷനായി. പി മുസ്തഫ, ടി.പി.എം ബശീര്‍, എം സുലൈമാന്‍, എം.എം ബശീര്‍, വാര്‍ഡ് അംഗം എ.പി സലീം, പി.എം ബാവ, എ.പി മുഹമ്മദ് സംസാരിച്ചു. പി.വി അബൂബക്കര്‍, എ.പി ഫൈസല്‍, പി ഹനീഫ, കെ.ടി ഫിറോസ്, എ.പി മുജീബ് നേതൃത്വം നല്‍കി.