ചണ്ഡീഗഡ്: കര്‍താര്‍പൂര്‍ തീര്‍ഥാടന ഇടനാഴി ഉദ്ഘാടനത്തിനായി പാകിസ്താനിലേക്കു പോയതിനെ വിമര്‍ശിച്ച ബി.ജെ.പിക്കു ശക്തമായ മറുപടിയുമായി നവ്‌ജ്യോത് സിങ് സിദ്ദു. പാകിസ്താനിലേക്കു പോകാന്‍ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി തന്നോട് ആവശ്യപ്പെട്ടിട്ടില്ലെന്നും പാക് പ്രധാനമന്ത്രി ഇമ്രാന്‍ഖാന്‍ വ്യക്തിപരമായി ക്ഷണിച്ചതിന്റെ അടിസ്ഥാനത്തിലാണ് ചടങ്ങില്‍ പങ്കെടുക്കാന്‍ പോയതെന്നും അദ്ദേഹം വ്യക്തമാക്കി.
സിദ്ദുവിന് ഇന്ത്യയിലുള്ളതിനേക്കാള്‍ ആരാധകര്‍ പാകിസ്താനിലാണെന്നു കേന്ദ്ര ഭക്ഷ്യസംസ്‌കരണ മന്ത്രി ഹര്‍സിമ്രത് കൗര്‍ ബാദല്‍ ആരോപിച്ചിരുന്നു. ഇതിനോടു പ്രതികരിക്കുകയായിരുന്നു അദ്ദേഹം. സന്ദര്‍ശനത്തില്‍ മുഖ്യമന്ത്രി അമരിന്ദര്‍ സിങ്ങും അതൃപ്തി അറിയിച്ചിരുന്നു. എന്നാല്‍, താന്‍ ആരോടും പറയാതെയല്ല പോയതെന്നു സിദ്ദു വ്യക്തമാക്കി.