ഭുവനേശ്വര്‍: ഹോക്കി ലോകകപ്പിലെ ഗ്രൂപ്പ് ഘട്ടത്തിലെ രണ്ടാം മത്സരത്തിന് ഇന്ത്യ ഇന്നിറങ്ങും. ബെല്‍ജിയത്തേയാണ് ഇന്ത്യ നേരിടുന്നത്.
ആദ്യ മത്സരത്തില്‍ ദക്ഷിണാഫ്രിക്കയെ തകര്‍ത്ത ആത്മവിശ്വാസം ഇന്ത്യക്കുണ്ടെങ്കിലും ഇന്ത്യ ഇന്ന് ജയത്തില്‍ കുറഞ്ഞതൊന്നും ആഗ്രഹിക്കുന്നില്ല. ഇന്നത്തെ മത്സരത്തില്‍ ജയിക്കാനായാല്‍ ഇന്ത്യക്ക് അനായാസം പ്രീക്വാര്‍ട്ടറിലെത്താനാകും. ലോക രണ്ടാം നമ്പറുകാരായ ബെല്‍ജിയത്തെ തോല്‍പ്പിക്കുക എന്നത് ശ്രമകരമായ കാര്യമാണെങ്കിലും ഇന്ത്യക്ക് ജയിക്കാനാകുമെന്ന് പരിശീലകന്‍ ഹരേന്ദ്ര സിങ് പറഞ്ഞു. യുവതാരങ്ങള്‍ പ്രതീക്ഷക്കൊത്ത പ്രകടനം പുറത്തെടുക്കുന്നുണ്ടെന്ന് അദ്ദേഹം കൂട്ടിച്ചേര്‍ത്തു.
ഗ്രൂപ്പിലെ മറ്റൊരു മത്സരത്തില്‍ കാനഡ ദക്ഷിണാഫ്രിക്കയെ നേരിടും. ആദ്യ മത്സരത്തില്‍ പരാജയപ്പെട്ട ടീമുകളായതിനാല്‍ ഇരു ടീമിനും ഇന്നത്തെ മത്സരം നിര്‍ണായകമാണ്.
ഇന്നലെ ഡി ഗ്രൂപ്പില്‍ നടന്ന മത്സരത്തില്‍ നെതര്‍ലന്‍ഡ് എതിരില്ലാത്ത ഏഴു ഗോളുകള്‍ക്ക് മലേഷ്യയെ പരാജയപ്പെടുത്തി. ജോസണ്‍ ഹെര്‍ട്ട്‌സ്ബര്‍ഗര്‍, മിക്രോ പ്രുയ്‌സര്‍, വാന്‍ഡര്‍ വീര്‍ദന്‍, റബോര്‍ട് കെംപര്‍മാന്‍, തിയറി ബ്രിങ്ക്മാന്‍ എന്നിവരാണ് നെതര്‍ലന്‍ഡിന് വേണ്ടി ഗോളുകള്‍ നേടിയത്.
മറ്റൊരു മത്സരത്തില്‍ ജര്‍മനി 1-0 എന്ന സ്‌കോറിന് പാകിസ്താനെ പരാജയപ്പെടുത്തി. ലോകകപ്പില്‍ ഏറ്റവും കൂടുതല്‍ തവണ ചാംപ്യന്‍മാരായ പാകിസ്താന് ആദ്യ മത്സരത്തിലെ തോല്‍വി തിരിച്ചടിയായി. ഏറെ നാളത്തെ അനിശ്ചിതത്വത്തിന് ശേഷമായിരുന്നു പാകിസ്താന്‍ ലോകകപ്പിനായി ഇന്ത്യയിലേക്കെത്തിയത്.