പെരിയ(കാസര്‍കോട്): കേന്ദ്ര സര്‍വകലാശാല വിദ്യാര്‍ഥികള്‍ രണ്ടാഴ്ചയോളമായി നടത്തി വന്നിരുന്ന സമരം പിന്‍വലിച്ചതിനെ തുടര്‍ന്ന് ഇന്നു മുതല്‍ സര്‍വകലാശാലയില്‍ പഠനം തുടങ്ങും. പുതുതായി പ്രവേശനം ലഭിച്ച ഇരുനൂറിലധികം വിദ്യാര്‍ഥി-വിദ്യാര്‍ഥിനികള്‍ക്ക് താമസ സൗകര്യവും ഭക്ഷണവും കിട്ടാത്തതില്‍ പ്രതിഷേധിച്ച് രണ്ടാഴ്ച മുമ്പു വിദ്യാര്‍ഥികള്‍ സമരം തുടങ്ങിയിരുന്നു. 

ഈ സമരം അധികൃതര്‍ മുഖവിലക്കെടുക്കാത്തതിനെ തുടര്‍ന്നു വിദ്യാര്‍ഥികള്‍ സമര രീതി മാറ്റുകയും ജില്ലയിലെ വിവിധ കാംപസുകളിലായി പഠനം നടത്തിയിരുന്ന വിദ്യാര്‍ഥികള്‍ പെരിയയിലെ പ്രധാന കാംപസിലെ പ്രധാന കോളജ് കെട്ടിടത്തില്‍ താമസം തുടങ്ങുകയുമായിരുന്നു. ഇതേ തുടര്‍ന്ന് സര്‍വകലാശാല അടച്ചിടുകയായിരുന്നു.
രണ്ടു ദിവസം മുമ്പു സര്‍വകലാശാല വൈസ് ചാന്‍സലര്‍ വിദ്യാര്‍ഥികളെ ചര്‍ച്ചക്കു വിളിച്ചെങ്കിലും വൈസ് ചാന്‍സലര്‍ ഡല്‍ഹിക്കു പോയതോടെ ചര്‍ച്ച നടന്നിരുന്നില്ല.
ഇക്കഴിഞ്ഞ ദിവസം വീണ്ടും ചര്‍ച്ച നടന്നെങ്കിലും വിദ്യാര്‍ഥികള്‍ക്ക് അനുകൂലമായ തീരുമാനം ഉണ്ടാകാതെ വന്നതോടെ വിദ്യാര്‍ഥികള്‍ മുഖ്യമന്ത്രിയെയും പ്രതിപക്ഷ നേതാവിനെയും കാണുന്നതിനുള്ള അവസരം തേടുകയും ചെയ്തിരുന്നു. പുതുതായി സര്‍വകലാശാലയില്‍ പ്രവേശനം നേടിയ വിദ്യാര്‍ഥികള്‍ ഉള്‍പ്പെടെ അഞ്ഞൂറോളം വിദ്യാര്‍ഥികളാണ് സമരത്തില്‍ പങ്കെടുത്തിരുന്നത്.