കാസര്‍കോട്: ബി.ജെ.പി പ്രഖ്യാപിച്ച ഹര്‍ത്താല്‍ ജില്ലയില്‍ പല ഭാഗങ്ങളിലും ഭാഗികം. കാസര്‍കോട് നഗരത്തില്‍ വാഹനങ്ങള്‍ ഓടിയെങ്കിലും വ്യാപാര സ്ഥാപനങ്ങള്‍ തുറക്കാതെ വന്നതോടെ തെരുവോര കച്ചവടം തകൃതിയായി നടന്നു. കറന്തക്കാട്ട് ഹര്‍ത്താലനുകൂലികള്‍ വാഹനങ്ങള്‍ തടഞ്ഞതു നിയമപാലകരുമായി വാക്കേറ്റത്തിനിടയാക്കി. കുമ്പളയില്‍ ഹര്‍ത്താല്‍ പൂര്‍ണമായിരുന്നു. കുമ്പളയിലെ വ്യാപാര സ്ഥാപനങ്ങള്‍ അടഞ്ഞു കിടന്നു. ഹര്‍ത്താലനുകൂലികള്‍ അതിരാവിലെ തന്നെ പാത ഉപരോധിച്ചു. അത്യാവശ്യങ്ങള്‍ക്കു വേണ്ടി ഓടിയ കാറുകള്‍ ഉള്‍പ്പെടെയുള്ള വാഹനങ്ങള്‍ക്കു നേരെ ചിലയിടങ്ങളില്‍ കല്ലേറുണ്ടായി. ദേശീയ പാതയിലും സംസ്ഥാന പാതയിലും പഞ്ചായത്ത് പാതയിലുമൊക്കെ വാഹനങ്ങള്‍ തടഞ്ഞു. പിന്നീട് പോലിസ് പട്രോളിങ് തുടങ്ങിയതോടെയാണു തടഞ്ഞിട്ട വാഹനങ്ങള്‍ വിട്ടയച്ചത്.
രാവിലെ പത്തിനു ശേഷം ബൈക്കുകളും മറ്റു ചെറുവാഹനങ്ങളും യഥേഷ്ടം ഓടി. ജില്ലയില്‍ മഞ്ചേശ്വരം,ഉപ്പള,കുമ്പള,കറന്തക്കാട്,ബട്ടത്തൂര്‍,കേളോത്ത്,മാവുങ്കാല്‍,ചാമുണ്ഡിക്കുന്ന്,ഉദുമ,നീലേശ്വരം,തച്ചങ്ങാട് തുടങ്ങിയ പ്രദേശങ്ങളിലൊക്കെ അതിരാവിലെ തന്നെ ഹര്‍ത്താലനുകൂലികള്‍ വാഹനങ്ങള്‍ തടഞ്ഞു.
കുന്നുംകൈ: ബി.ജെ.പി പ്രഖ്യാപിച്ച ഹര്‍ത്താല്‍ മലയോരത്ത് ഭാഗികം. വെള്ളരിക്കുണ്ട്, ഭീമനടി, ചിറ്റാരിക്കാല്‍ എന്നിവിടങ്ങളില്‍ കട കമ്പോളങ്ങള്‍ ഭാഗികമായി തുറന്നു. സ്വകാര്യ ബസുകളും ഓട്ടോറിക്ഷകളും നിരത്തിലിറങ്ങില്ല. ഇരുചക്ര വാഹനങ്ങളും മറ്റു സ്വകാര്യ വാഹനങ്ങളും നിരത്തിലിറങ്ങി. അത്യാവശ്യ വാഹനങ്ങള്‍ ഒഴിച്ചാല്‍ ഗതാഗതം പൂര്‍ണമായും സ്തംഭിച്ചു. ദൂരെയുള്ള ബസുകള്‍ ചിലതു സര്‍വിസ് നടത്തി. ചിലയിടങ്ങളില്‍ വാഹനങ്ങള്‍ തടഞ്ഞതു സംഘര്‍ഷത്തിനിടയാക്കി.ഉച്ചയ്ക്കു ശേഷം ചിലയിടങ്ങളില്‍ കടകള്‍ തുറന്നു പ്രവര്‍ത്തിച്ചു. പ്രധാന ടൗണില്‍ ഹര്‍ത്താലനുകൂലികള്‍ പ്രകടനം നടത്തി.
ചീമേനി: സംസ്ഥാനത്ത് ബി.ജെ.പി ആഹ്വാനം ചെയ്ത ഹര്‍ത്താല്‍ ചീമേനിയിലും പരിസര പ്രദേശങ്ങളിലും കാര്യമായി ബാധിച്ചില്ല. ചീമേനി ടൗണില്‍ കടകള്‍ ഭാഗികമായി തുറന്നു പ്രവര്‍ത്തിച്ചു.
അതേസമയം പള്ളിപ്പാറ, കാക്കടവ്, ചാനടുക്കം, നിടുമ്പ, ചെമ്പ്രകാനം, കയ്യൂര്‍, വെളിച്ചംതോട്, പോത്താങ്കണ്ടം തുടങ്ങിയ പ്രധാന കവലകളില്‍ പൂര്‍ണമായും കടകള്‍ തുറന്നു പ്രവര്‍ത്തിച്ചിരുന്നു. ഞായറാഴ്ചയായതിനാല്‍ ജനജീവിതത്തെയും ഹര്‍ത്താല്‍ കാര്യമായി ബാധിച്ചില്ല. ബസ് സര്‍വിസുകള്‍ ഉണ്ടായില്ലെങ്കിലും സ്വകാര്യ വാഹനങ്ങള്‍ പതിവു പോലെ നിരത്തുകളില്‍ സജീവമായിരുന്നു. ഓട്ടോറിക്ഷകള്‍ അടക്കമുള്ള ടാക്‌സി സര്‍വിസുകള്‍ സ്റ്റാന്‍ഡില്‍ പതിവുപോലെ പ്രവര്‍ത്തിച്ചത് മലയോര പ്രദേശങ്ങളിലെ യാത്രക്കാരെയും വലച്ചില്ല.