തൃശൂര്‍: ഡിസംബര്‍ ആദ്യവാരത്തില്‍ സ്വിറ്റ്‌സര്‍ലാന്റില്‍ നടക്കുന്ന ഇന്ത്യന്‍ ഫെസ്റ്റിവലില്‍ കഥകളി അവതരിപ്പിക്കുവാന്‍ വേണ്ടി ചെറുതുരുത്തി കഥകളി സ്‌കൂള്‍ കലാകാരന്‍മാര്‍ ഇന്ന് യാത്ര തിരിക്കും. അഞ്ച്, ആറ്, ഏഴ് തീയതികളില്‍ സെന്റ്ഗാലന്‍, ബേസല്‍, ബെര്‍ണെ എന്നീ സ്വിറ്റ്‌സര്‍ലാന്റിലെ പ്രധാന നഗരങ്ങളില്‍ സംഘം കഥകളി അവതരിപ്പിക്കും. ഇന്ത്യന്‍ എംബസിയാണ് പരിപാടിയുടെ സംഘാടകര്‍. കഥകളി സ്‌കൂള്‍ ഡയരക്ടര്‍ കലാമണ്ഡലം ഗോപാലകൃഷ്ണന്റെ നേതൃത്വത്തിലുള്ള ഏഴ് അംഗ സംഘമാണ് യാത്ര തിരിക്കുന്നത്.  കലാമണ്ഡലം ഉദയകുമാര്‍, കലാമണ്ഡലം ശിവദാസന്‍, കലാമണ്ഡലം മഹേന്ദ്രന്‍, കലാമണ്ഡലം അരവിന്ദ്, കലാമണ്ഡലം മുരളീധരന്‍, സദനം വിവേക് എന്നിവരാണ് സംഘത്തിലുള്ളത്. 'ദുര്യോധനവധം' കഥകളിയും കഥകളി ഡെമോണ്‍സ്‌ട്രേഷനും വര്‍ക്‌ഷോപ്പും നടത്തുന്നുണ്ട്.