കെ.എസ്.ആര്‍.ടി.സിയുടെ 45 സര്‍വിസുകള്‍                
കല്‍പ്പറ്റ: കെ.എസ്.ആര്‍.ടി.സിയിലെ ഭരണപക്ഷ തൊഴിലാളി സംഘടനയായ സി.ഐ.ടി.യുവിന്റെ യൂനിറ്റ് സമ്മേളനങ്ങള്‍ നടത്തിയ ദിവസം ബസ് സര്‍വിസുകള്‍ വ്യാപകമായി റദ്ദാക്കിയതായി പരാതി. ജീവനക്കാര്‍ സമ്മേളനത്തിനു പോയതോടെ ബസ് സര്‍വിസ് നടത്താന്‍ ജീവനക്കാരില്ലാതെ വന്നതാണ് പ്രശ്‌നമായത്.
മുന്നറിയിപ്പില്ലാതെ ദീര്‍ഘദൂര ബസ് സര്‍വിസുകളടക്കം മുടങ്ങിയത് യാത്രക്കാര്‍ക്ക് ദുരിതമായി. കെ.എസ്.ആര്‍.ടി.സിക്ക് ലക്ഷങ്ങളുടെ നഷ്ടവും സംഭവിച്ചു. കഴിഞ്ഞ ദിവസങ്ങളിലായി കല്‍പ്പറ്റ, മാനന്തവാടി യൂനിറ്റ് സമ്മേളനങ്ങളാണ് നടന്നത്. കോഴിക്കോട് അടക്കമുള്ള ദീര്‍ഘദൂര സര്‍വിസുകളിലൂടെ നല്ല വരുമാനമാണ് കെ.എസ്.ആര്‍.ടി.സിക്ക് ലഭിക്കുന്നത്. കല്‍പ്പറ്റ യൂിിറ്റ് സമ്മേളനം നടന്ന ദിവസം കല്‍പ്പറ്റ ഡിപ്പോയിലെ 71 സര്‍വിസുകളില്‍ 26 എണ്ണം അയക്കാനായില്ല.
ഇതില്‍ ദീര്‍ഘദൂര സര്‍വിസുകളും ഉള്‍പ്പെടും. 6.40ന്റെ പെരിക്കല്ലൂര്‍, 5.45-ബത്തേരി, 6.35-കോഴിക്കോട്, 7.10-തൃശൂര്‍, 7.10-വെള്ളരിക്കുണ്ട്, 7.20-ബത്തേരി, 7-മെച്ചന, 11.30-കോഴിക്കോട്, 12.10-കോഴിക്കോട്, 12.30-കോഴിക്കോട്, 1.10-കോഴിക്കോട്, 2.30 -കോഴിക്കോട്, 2.45-കോഴിക്കോട്, 3.20-ബത്തേരി തുടങ്ങിയ റൂട്ടിലെ സര്‍വിസുകള്‍ മുടങ്ങിയതിനൊപ്പം ലോക്കല്‍ സര്‍വിസുകളായ 6-മുണ്ടക്കെ, 6.30-മാനന്തവാടി, 6.40-അട്ടമല, 7-മാനന്തവാടി, 7-വൈത്തിരി, 7.30-വെള്ളച്ചിമൂല, 8-മാനന്തവാടി, 7.45-മാടക്കുന്ന്, 11.30-മേപ്പാടി, 11.55-അട്ടമല, 2-മുണ്ടക്കൈ എന്നിവയും മുടങ്ങി.
സമ്മേളന ദിവസം കല്‍പ്പറ്റ ഡിപ്പോയിലെ ഉത്തരവാദപ്പെട്ടവരില്‍ പലരും ഓഫിസില്‍ ഇല്ലായിരുന്നതും പകരം സംവിധാനം ഏര്‍പ്പെടുത്തുന്നതിനു തടസമായി. മാനന്തവാടി ഡിപ്പോയിലെ ജീവനക്കാരുടെ സമ്മേളന ദിവസം 19 സര്‍വിസുകളാണ് മുടങ്ങിയത്. ആകെയുള്ള 85 സര്‍വിസുകളാണ്. ജീവനക്കാരുടെ സമ്മേളനത്തെ തുടര്‍ന്ന് സര്‍വിസ് മുടങ്ങിയതുവഴി കല്‍പ്പറ്റ ഡിപ്പോയ്ക്ക് ഏറ്റവും കുറഞ്ഞത് മൂന്നു ലക്ഷം രൂപയുടെയെങ്കിലും നഷ്ടം സംഭവിച്ചിട്ടുണ്ടെന്നാണ് കണക്കുകൂട്ടുന്നത്.
 ഈമാസം 13നാണ് ബത്തേരി യൂനിറ്റ് സമ്മേളനം. ഏറ്റവും കൂടുതല്‍ ബസ് സര്‍വിസുകള്‍ നടത്തുന്ന ജില്ലാ ഡിപ്പോയാണ് ബത്തേരി. സമ്മേളന ദിവസം പകരം സംവിധാനം ഏര്‍പ്പെടുത്തിയില്ലെങ്കില്‍ ഇവിടെയും കൂട്ടത്തോടെ സര്‍വിസുകള്‍ റദ്ദാക്കാനുള്ള സാധ്യതയാണുള്ളത്, ഒപ്പം കെ.എസ്.ആര്‍.ടി.സിക്ക് ലക്ഷങ്ങളുടെ ന്ഷടവും.