ലണ്ടന്‍: ബ്രെക്‌സിറ്റ് കരാറിനെ ചൊല്ലി മന്ത്രിസഭയിലെ കൂട്ടച്ചോര്‍ച്ചയ്ക്കു പിറകെ ബ്രിട്ടീഷ് പ്രധാനമന്ത്രി തെരേസാ മേയ്ക്ക് അവിശ്വാസ പ്രമേയ ഭീഷണിയും. പ്രധാന പ്രതിപക്ഷമായ ലേബര്‍ പാര്‍ട്ടിയാണ് അവിശ്വാസ പ്രമേയ നടപടികളിലേക്കു നീങ്ങുമെന്ന് അറിയിച്ചിരിക്കുന്നത്.
യൂറോപ്യന്‍ യൂനിയനുമായുള്ള ബ്രെക്‌സിറ്റ് കരാറുമായി ബന്ധപ്പെട്ടു മേയ്ക്കു ലഭിച്ച നിയമോപദേശം പൂര്‍ണമായി പാര്‍ലമെന്റില്‍ അവതരിപ്പിക്കാനായില്ലെങ്കില്‍ അവിശ്വാസ പ്രമേയം അവതരിപ്പിക്കുമെന്നു പാര്‍ട്ടിയുടെ ബ്രെക്‌സിറ്റ് വക്താവ് കീര്‍ സ്റ്റാര്‍മര്‍ അറിയിച്ചു.
ഇ.യുവുമായുണ്ടാക്കിയ കരാറിനുമേല്‍ 11നു പാര്‍ലമെന്റില്‍ വോട്ടെടുപ്പ് നടക്കാനിരിക്കേയാണ് പുതിയ ഭീഷണികൂടി തെരേസാ മേയ്ക്കു വെല്ലുവിളിയായിരിക്കുന്നത്.
വോട്ടെടുപ്പില്‍ കരാറിനെതിരേ വോട്ട് ചെയ്യുമെന്നും കീര്‍ സ്റ്റാര്‍മര്‍ അറിയിച്ചിട്ടുണ്ട്. നിയമോപദേശവുമായി ബന്ധപ്പെട്ട വിവരം അടുത്ത ദിവസംതന്നെ സമര്‍പ്പിക്കണമെന്നാണ് പാര്‍ട്ടി ആവശ്യപ്പെട്ടിരിക്കുന്നത്. വോട്ടെടുപ്പില്‍ മേ പരാജയപ്പെട്ടാലും അവിശ്വാസ പ്രമേയത്തിലേക്കു നീങ്ങുമെന്നു സ്റ്റാര്‍മര്‍ പറഞ്ഞു.
കരാറിനുതന്നെ പാര്‍ലമെന്റിന്റെ അംഗീകാരം ലഭിക്കില്ലെന്ന് ഉറപ്പായ സ്ഥിതിക്ക് അവിശ്വാസ പ്രമേയം എന്തായാലും പാസാകുമെന്നാണ് രാഷ്ട്രീയ നിരീക്ഷകര്‍ വിലയിരുത്തുന്നത്. പ്രതിപക്ഷം അവിശ്വാസ പ്രമേയത്തിലേക്കു നീങ്ങിയാല്‍ തെരേസാ മേ സര്‍ക്കാരിനെ താങ്ങിനിര്‍ത്തുന്ന നോര്‍ത്തേണ്‍ ഐറിഷ് പാര്‍ട്ടിയും പിന്താങ്ങുമെന്നു ബ്രിട്ടീഷ് മാധ്യമങ്ങള്‍ റിപ്പോര്‍ട്ട് ചെയ്യുന്നു.
അതിനിടെ, പുതിയൊരു മന്ത്രികൂടി മേയ്ക്കു വെല്ലുവിളിയുയര്‍ത്തി രംഗത്തെത്തിയിട്ടുണ്ട്. കരാറിനു പാര്‍ലമെന്റില്‍ അംഗീകാരം ലഭിച്ചില്ലെങ്കില്‍ രാജ്യത്തു വീണ്ടുമൊരു ജനഹിത പരിശോധന നടത്തണമെന്ന് പരിസ്ഥിതി, ഗ്രാമീണ, ഭക്ഷ്യ മന്ത്രി മൈക്കല്‍ ഗോവ് ആവശ്യപ്പെട്ടു.
11നു നടക്കുന്ന വോട്ടെടുപ്പില്‍ കരാര്‍ തള്ളിപ്പോയാല്‍ ബ്രെക്‌സിറ്റ് തന്നെ അപകടത്തിലാകുമെന്നും അദ്ദേഹം പറഞ്ഞു. ബ്രെക്‌സിറ്റ് കരാറില്‍ പ്രതിഷേധിച്ചു ശനിയാഴ്ച ശാസ്ത്ര-സര്‍വകലാശാലാ മന്ത്രി സാം ഗ്വിമാ രാജിവച്ചിരുന്നു.