കൊച്ചി: കരുവേലിപ്പടിയിലെ മത്സ്യസംസ്‌കരണ സ്ഥാപനത്തില്‍നിന്ന് ആറായിരം കിലോ സ്രാവിന്‍ ചിറകുകള്‍ പിടിച്ചെടുത്ത സംഭവത്തില്‍ സ്ഥാപന ഉടമയ്‌ക്കെതിരേ ജാമ്യമില്ലാ വകുപ്പുപ്രകാരം കേസെടുത്തു.
ഇന്ത്യയില്‍ ചിറകിനായുള്ള കടല്‍ സ്രാവ് വേട്ട നിരോധിച്ചതിനാലാണ് കേസെടുത്തത്. പതിനഞ്ചു കോടി രൂപ വിലമതിക്കുന്ന സ്രാവിന്‍ ചിറകുകള്‍ സ്ഥാപനത്തിന്റെ രണ്ടു ഗോഡൗണുകളില്‍ നിന്നാണു കഴിഞ്ഞദിവസം പിടിച്ചെടുത്തത്. ശനിയാഴ്ച രാത്രി ലഭിച്ച രഹസ്യ വിവരത്തിന്റെ അടിസ്ഥാനത്തില്‍ എറണാകുളം ഷാഡോ പൊലിസ് നടത്തിയ പരിശോധനയിലാണ് മട്ടാഞ്ചേരിക്കടുത്ത്
കരുവേലിപ്പടിയിലെ മറൈന്‍ ഫിങ്‌സ് എന്ന സ്ഥാപനത്തില്‍നിന്ന് ചിറകുകള്‍ പിടികൂടിയത്. വല്ലാര്‍പാടം തുറമുഖം വഴി കൊളംബോയിലേക്കു കടത്താനാണ് ഇതു സൂക്ഷിച്ചിരുന്നത്. പിന്നീടത് ചൈന, ജപ്പാന്‍ എന്നിവിടങ്ങളിലേക്ക് കയറ്റുമതി ചെയ്യും. സംരക്ഷിത ജീവി വിഭാഗത്തില്‍പെട്ട കടല്‍ സ്രാവിന്റെ ഉണങ്ങിയ ചിറകുകളാണ് കണ്ടെടുത്തത്. ഇവയുടെ ചിറകുകള്‍ക്കുള്ളിലെ നാരുകള്‍ക്ക് കിലോഗ്രാമിന് 15, 000 രൂപയോളം വിലമതിക്കുമെന്നാണ് പൊലിസ് പറയുന്നത്. വിദേശ രാജ്യങ്ങളില്‍ പ്രോട്ടീന്‍ നിര്‍മാണത്തിനാണ് ഇവ ഉപയോഗിക്കുന്നത്.