ബെര്‍ലിന്‍: തെക്കന്‍ ജര്‍മനിയിലെ കൊന്‍സ്ടാന്‍സ് നഗരത്തിലെ നിശാക്ലബിലുണ്ടായ വെടിവയ്പില്‍ രണ്ടു പേര്‍ മരിച്ചു. നാലു പേര്‍ക്ക് ഗുരുതരമായി പരുക്കേറ്റു. നഗരത്തിലെ ഗ്രേ ക്ലബ് നിശാക്ലബിലാണ് വെടിവയ്പുണ്ടായത്.
ഭീകരാക്രമാണെന്ന് കരുതുന്നില്ലെന്ന് പൊലിസ് വക്താവ് ഫ്രിട്‌സ് ബെസികോഫര്‍ പറഞ്ഞു. പുലര്‍ച്ചെ നാലരയോടെയാണ് ആക്രമണമുണ്ടായത്. ഒരാള്‍ തല്‍ക്ഷണം കൊല്ലപ്പെട്ടു. സ്വിറ്റ്‌സര്‍ലന്റ് അതിര്‍ത്തിയോട് ചേര്‍ന്നുള്ള പ്രദേശത്താണ് നിശാക്ലബ് പ്രവര്‍ത്തിക്കുന്നത്. ക്ലബില്‍ നിന്ന് രക്ഷപ്പെട്ട അക്രമിയെ പൊലിസ് പിന്തുടര്‍ന്ന് വെടിവച്ചു വീഴ്ത്തുകയായിരുന്നു.
34 കാരനാണ് അക്രമി. ഇയാള്‍ ഇറാഖ് പൗരനാണ്. എന്നാല്‍ അഭയാര്‍ഥിയായി രാജ്യത്തെത്തിയ ആളല്ല.
ജര്‍മനിയില്‍ വര്‍ഷങ്ങളായി താമസിക്കുന്നയാളാണ് പ്രതി. ആക്രമണം നടക്കുമ്പോള്‍ നൂറോളം പേര്‍ ക്ലബിലുണ്ടായിരുന്നുവെന്ന് പൊലിസ് പറഞ്ഞു.