മിയാമി: പ്രീ സീസണ്‍ പോരാട്ടമായ ഇന്‍ര്‍ നാഷനല്‍ ചാംപ്യന്‍സ് കപ്പില്‍ അരങ്ങേറിയ എല്‍ ക്ലാസിക്കോയില്‍ റയല്‍ മാഡ്രിഡിനെ വീഴ്ത്തി ബാഴ്‌സലോണ വിജയം സ്വന്തമാക്കി. 3-2ന് വിജയിച്ച അവര്‍ ചിര വൈരികളായ എതിരാളികളെ പരാജയപ്പെടുത്തി കിരീടം പിടിച്ചെടുത്തു. അടിക്ക് തിരിച്ചടി എന്ന നിലയില്‍ മത്സരം പുരോഗമിച്ചപ്പോള്‍ ആദ്യ പകുതിയില്‍ തന്നെ ഇരു പക്ഷവും രണ്ട് ഗോളുകള്‍ വീതം വലയിലെത്തിച്ച് ഒപ്പത്തിനൊപ്പം നിന്നു.
കളിയുടെ മൂന്നാം മിനുട്ടില്‍ ലയണല്‍ മെസ്സി ബാഴ്‌സയെ മുന്നിലെത്തിച്ചപ്പോള്‍ ഏഴാം മിനുട്ടില്‍ റാകിറ്റിച്ചും വല ചലിപ്പിച്ച് ലീഡുയര്‍ത്തി.
എന്നാല്‍ 14ാം മിനുട്ടില്‍ കോവാക്കിച്, 36ാം മിനുട്ടില്‍ അസെന്‍സിയോ എന്നിവരുടെ ഗോളുകളില്‍ റയല്‍ സമനില പിടിച്ചു. രണ്ടാം പകുതിയില്‍ ജെറാര്‍ഡ് പിക്വെ കറ്റാലന്‍ പടയ്ക്ക് വിജയ ഗോള്‍ സമ്മാനിക്കുകയായിരുന്നു.
പി.എസ്.ജിക്ക് കിരീടം
ടാംഗിയേഴ്‌സ് (മൊറോക്കോ): യുവന്റസില്‍ നിന്ന് ഫ്രഞ്ച് ടീം പാരിസ് സെന്റ് ജെര്‍മെയ്‌ന്റെ കൂടാരത്തിലേക്ക് ചേക്കേറിയ മുന്‍ ബാഴ്‌സലോണ താരം ഡാനി ആല്‍വെസ് പി.എസ്.ജിയുടേയും ഭാഗ്യ താരം. ഒരു ഗോള്‍ നേടുകയും ഒരു ഗോളിന് അവസരമൊരുക്കുകയും ചെയ്ത് ക്ലബിനായുള്ള അരങ്ങേറ്റ പോരാട്ടം കിരീട നേട്ടത്തോടെ താരം അവിസ്മരണീയമാക്കി.
ഫ്രഞ്ച് ലീഗ് വണ്‍ സീസണിന്റെ മുന്നോടിയായി നടക്കുന്ന ഫ്രഞ്ച് ചാംപ്യന്‍സ് ട്രോഫി (സൂപ്പര്‍ കപ്പ്) പോരാട്ടത്തിലാണ് മൊണാക്കോക്കെതിരേ ക്ലബിന് ട്രോഫി സമ്മാനിച്ച പ്രകടനം ബ്രസീല്‍ താരം പുറത്തെടുത്തത്. 2-1നാണ് പി.എസ്.ജി വിജയം പിടിച്ചത്. ഫ്രഞ്ച് ലീഗ് വണ്‍ ചാംപ്യന്‍മാരും ഫ്രഞ്ച് കപ്പ് ചാംപ്യന്‍മാരും സീസണിന് മുന്നോടിയായാണ് ഈ പോരാട്ടത്തില്‍ ഏറ്റുമുട്ടുന്നത്. പി.എസ്.ജി തുടര്‍ച്ചയായി അഞ്ചാം തവണയാണ് ചാംപ്യന്‍സ് ട്രോഫി കിരീടം നേടുന്നത്.