ന്യൂഡല്‍ഹി: പാചകവാതക സിലിണ്ടറിനുള്ള സബ്‌സിഡി ഒഴിവാക്കാന്‍ കേന്ദ്രസര്‍ക്കാര്‍ തീരുമാനം. കേന്ദ്ര പെട്രോളിയം മന്ത്രി ധര്‍മേന്ദ്ര പ്രധാന്‍ ലോക്‌സഭയെ അറിയിച്ചതാണ് ഇക്കാര്യം.

അടുത്തവര്‍ഷം മാര്‍ച്ചോടെ സബ്‌സിഡി മുഴുവനായും എടുത്തുകളയും. 2018 മാര്‍ച്ച് വരെ ഓരോ മാസവും സിലിണ്ടറിന് നാലു രൂപ വരെ കൂട്ടുകയും ചെയ്യും.

മൂല്യവര്‍ധിത നികുതി (വാറ്റ്) ക്കു പുറമെ കഴിഞ്ഞ സര്‍ക്കാര്‍ മാസംതോറും രണ്ടുരൂപ വര്‍ധിപ്പിക്കാന്‍ അനുമതി നല്‍കിയിരുന്നുവെന്നാണ് ധര്‍മേന്ദ്ര പ്രധാന്റെ ന്യായീകരണം.

2017 ജൂണ്‍ ഒന്നു മുതല്‍ പ്രാബല്യത്തില്‍ വരുന്ന വിധത്തിലാണ് വില വര്‍ധിപ്പിക്കാന്‍ അനുമതി നല്‍കിയിരിക്കുന്നത്. ഇതനുസരിച്ച് കഴിഞ്ഞകാല വില ഇപ്പോള്‍ തന്നെ കൂടാന്‍ സാധ്യതയുണ്ട്.

18.11 കോടി ഉപഭോക്താക്കള്‍ക്കാണ് ഇപ്പോള്‍ സബ്‌സിഡിയോടെ പാചകവാതക സിലിണ്ടര്‍ ലഭിക്കുന്നത്. ഇതില്‍ 2.5 കോടി പേര്‍ പാവപ്പെട്ട സ്ത്രീകള്‍ക്കു വേണ്ടി പ്രധാനമന്ത്രി നടത്തിയ ഉജ്ജ്വല യോജ്‌ന പ്രകാരം കണക്ഷന്‍ നേടിയവരാണ്.