മന്‍സൂര്‍ കാരാക്കുറിശി

മണ്ണാര്‍ക്കാട്: തത്തേങ്ങലത്ത് ആദിവാസികള്‍ക്ക് ഭൂമി വിതരണത്തിന് റവന്യൂ വകുപ്പ് ഒരുങ്ങുമ്പോഴും കോടികള്‍ മുടക്കി പണികഴിപ്പിച്ച കെ.എസ്.ഇ.ബി ക്വാര്‍ട്ടേഴ്‌സുകള്‍ നോക്കുക്കുത്തിയാകുന്നു. പാത്രക്കടവ് ജല വൈദ്യുത പദ്ധതിക്ക് വേണ്ടി 1984-85 കാലയളവില്‍ നിര്‍മ്മിച്ച കെട്ടിടങ്ങളാണ് ഉപയോഗ്യശൂന്യമായി നശിച്ചു കൊണ്ടിരിക്കുന്നത്. പദ്ധതി പിന്നീട് ഉപേക്ഷിക്കുകയായിരുന്നു.
40 ഓളം വരുന്ന ക്വാട്ടേഴ്‌സുകളാണ് ഇവിടെ സ്ഥിതി ചെയ്യുന്നത്. കെ.എസ്.ഇ.ബി യുടെ അധീനതയിലുള്ള സ്ഥലത്താണ് പൊതുജനങ്ങളുടെ നികുതിയില്‍ നിര്‍മിച്ച സൗധങ്ങള്‍ കാട്കയറി കിടക്കുന്നത്. കഴിഞ്ഞ ദിവസം ജില്ലാ കലക്ടര്‍ ഡോ. ഡി. ബാലമുരളി, ഒറ്റപ്പാലം സബ് കലക്ടര്‍ ജെറോമിക് ജോര്‍ജ്, റവന്യൂ വകുപ്പ്, പട്ടിക ജാതി പട്ടിക വര്‍ഗ വികസന വകുപ്പ് മേഖല സന്ദര്‍ശിച്ചു സ്ഥിതിഗതികള്‍ വിലയിരുത്തിയിരുന്നു.
അട്ടപ്പാടി ചിറ്റൂര്‍ മേഖലയിലെ 141 ആദിവാസി കുടുംബങ്ങളെ പുനരധിവസിപ്പിക്കുന്ന നടപടികളാണ് ഇവിടെ പുരോഗമിക്കുന്നത്. തത്തേങ്ങലത്ത് 165 ഹെക്ടര്‍ വനഭൂമിയാണ് റവന്യൂ വകുപ്പിന് വിട്ടു കിട്ടിയിട്ടുള്ളത്. 150 കുടുംബങ്ങള്‍ക്ക് കൂടി ഇവിടെ ഭൂമി പതിച്ചു നല്‍കാന്‍ കഴിയുമെന്നും 2019 ജനുവരി ആദ്യത്തോടെ പദ്ധതി ആരംഭിക്കാന്‍ ആകുമെന്നും കലക്ടര്‍ അറിയിച്ചിരുന്നു. കെട്ടിടങ്ങള്‍ നില കൊള്ളുന്ന കെ.എസ്.ഇ.ബി യുടെ കീഴിലുള്ള സ്ഥലം കൂടി ഏറ്റെടുത്താല്‍ വലിയൊരു സമ്പത്തിക പ്രതിസന്ധി മറികടക്കാന്‍ സര്‍ക്കാരിന് കഴിഞ്ഞേക്കും. നശിച്ചുകൊണ്ടിരിക്കുന്ന ക്വോട്ടേഴ്‌സുകള്‍ അറ്റക്കുറ്റപ്പണി നടത്തി വാസയോഗ്യമാക്കുകയോ പദ്ധതിക്ക് വേണ്ടി ഉപയോഗപ്രദമാക്കുകയോ ചെയ്യാവുന്നതാണ് എന്നിരിക്കെ നടപടി എടുക്കാതെ അധികാരികള്‍ ഇരുട്ടില്‍ തപ്പുകയാണ്.
പലതവണ മാറി മാറി വരുന്ന സര്‍ക്കാരുകളുടെ ശ്രദ്ധയില്‍പ്പെടുത്തിയിട്ടും യാതൊരു നടപടിയും കൈകൊള്ളാതെ സര്‍ക്കാരുകളും അധികൃതരും കോടികള്‍ നഷ്ടമാക്കിക്കൊണ്ടിരിക്കുകയാണ്. ഒരു കൂരക്ക് വേണ്ടി ആദിവാസികള്‍ ഓഫിസുകള്‍ തോറും കയറിയിറങ്ങുമ്പോഴാണ് ആര്‍ക്കും ഉപയോഗപ്പെടാതെ പണികഴിപ്പിച്ചിട്ടിരിക്കുന്ന ക്വാട്ടേഴ്‌സുകള്‍ അനാഥമായി കിടക്കുന്നത്.
ഇതിനെ വേണ്ട രീതിയില്‍ ഉപയോഗപ്പെടുത്താന്‍ സര്‍ക്കാര്‍, റവന്യൂ വകുപ്പ് മേധാവികള്‍ തയ്യാറാവണമെന്നാണ് പ്രദേശവാസികളുടെ ആവശ്യം.ആദിവാസികള്‍ക്ക് ഈ ക്വാര്‍ട്ടേഴ്‌സുകള്‍ നല്‍കിയാല്‍ വീടുകള്‍ക്ക് വേണ്ടി തുക ചിലവഴിക്കേണ്ടിവരില്ല.