കോഴിക്കോട്: തിരുവനന്തപുരത്ത് നടന്ന സമാധാനചര്‍ച്ച റിപ്പോര്‍ട്ട് ചെയ്യാനെത്തിയ മാധ്യമപ്രവര്‍ത്തകരോടുള്ള മുഖ്യമന്ത്രിയുടെ പ്രതികരണം ഗ്രാമീണഭാഷയായിരിക്കാമെന്ന് സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍. കോഴിക്കോട്ട് മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
മനുഷ്യര്‍ എല്ലായ്‌പ്പോഴും അച്ചടിഭാഷ തന്നെ സംസാരിക്കണമെന്നില്ല. പിണറായി വിജയന്‍ പറയാനുള്ളതു നാടന്‍ഭാഷയില്‍ പറഞ്ഞതാവാം. അത് വലിയ വിഷയമായി കാണേണ്ടതില്ല. അദ്ദേഹം ഏത് സാഹചര്യത്തിലും രീതിയിലുമാണ് അത് പറഞ്ഞതെന്നറിയില്ല. വിഷയം മുഖ്യമന്ത്രി തന്നെ വൈകാതെ വിശദീകരിക്കുമെന്നും കാനം പറഞ്ഞു.
മുഖ്യമന്ത്രിയെയും ഡി.ജി.പിയെയും വിളിച്ചുവരുത്താന്‍ ഗവര്‍ണര്‍ പി. സദാശിവത്തിന് അധികാരമില്ല. സംസ്ഥാനത്തെ ജനങ്ങള്‍ തെരഞ്ഞെടുത്ത കൗണ്‍സിലിന്റെ ശുപാര്‍ശക്കനുസരിച്ചു പ്രവര്‍ത്തിക്കേണ്ട ആളാണ് ഗവര്‍ണറെന്നാണു മനസിലാക്കുന്നത്. ഭരണഘടന നന്നായി അറിയാവുന്ന ഗവര്‍ണര്‍ സൗഹൃദത്തിന്റെ പേരിലായിരിക്കും മുഖ്യമന്ത്രിയെ വിളിച്ചത്. അധികാരത്തിന്റെയും സാങ്കേതികത്വത്തിന്റെയും പേരിലാണ് മുഖ്യമന്ത്രിയെ വിളിച്ചതെങ്കില്‍ നടപടി ഭരണഘടനാ വിരുദ്ധമാണെന്നും കാനം പറഞ്ഞു.