ഹോഷിയാര്‍പൂര്‍: പഞ്ചാബില്‍ തീര്‍ഥാടകര്‍ക്കു നേരെ ബസ് പാഞ്ഞുകയറി ഏഴു പേര്‍ മരിച്ചു. അപകടത്തില്‍ 13 പേര്‍ക്ക് പരുക്കേറ്റു. ഹോഷിയാര്‍പൂര്‍, ചിന്ദ്പൂര്‍ണി ഹൈവേയിലായിരുന്നു അപകടം. മരിച്ചവരില്‍ നാലു സ്ത്രീകള്‍ ഉള്‍പ്പെടുന്നു.

സംഭവത്തില്‍ പരുക്കേറ്റവരെ അടുത്തുള്ള സ്വകാര്യ ആശുപത്രി യില്‍ പ്രവേശിപ്പിച്ചു. ബ്രേക്ക് തകരാറിലയാതാണ് അപകട കാരണം. ഹിമാചല്‍പ്രദേശിലെ ചിന്ദ്പൂര്‍ണി ക്ഷേത്രത്തിലേക്ക് യാത്രതിരിച്ച തീര്‍ഥാടകരാണ് അപകടത്തില്‍പെട്ടത്. ഹൈവേക്കരികല്‍ വിശ്രമത്തിനായിറങ്ങിയ തീര്‍ഥാടകരിലേക്ക് ബ്രേക്ക് നഷ്ടപ്പെട്ട മറ്റൊരു ബസ് ഇടിച്ചുകയറുകയായിരുന്നു. അപകടം നടന്നത് ഉയര്‍ന്ന പ്രദേശമായതിനാല്‍ അപകടിത്തില്‍ പെട്ടവരെ ആശുപത്രിയിലെത്തിക്കാന്‍ വൈകിയെന്ന് പൊലിസ് അറിയിച്ചു.

പരുക്കേറ്റവരില്‍ ചിലരുടെ നില ഗുരുതരമാണ്. സംഭവത്തില്‍ മുഖ്യമന്ത്രി പ്രകാശ്‌സിങ് ബാദല്‍ അനുശോചനം രേഖപ്പെടുത്തുകയും മരിച്ചവരുടെ കുടുംബത്തിന് ധനസഹായം പ്രഖ്യാപിക്കുകയും ചെയ്തു. പരുക്കേറ്റവരുടെ ചികിത്സാ ചെലവും ഗവണ്‍മെന്റ് വഹിക്കും.