എരുമപ്പെട്ടി: ദേശീയ ഫുട്‌ബോള്‍ മത്സരത്തില്‍ പങ്കെടുക്കുന്ന കേരള സ്‌കൂള്‍ അണ്ടര്‍ സെവന്റീന്‍ ടീമിന് തദ്ദേശ സ്വയം ഭരണ വകുപ്പ് മന്ത്രി എ.സി മൊയ്തീന്‍ ജെഴ്‌സി കൈമാറി.
എരുമപ്പെട്ടി പ്രസ് ക്ലബില്‍ നടന്ന ചടങ്ങില്‍ ടീം ക്യാപ്റ്റന്‍ ആദില്‍ അമല്‍ അംഗങ്ങള്‍ക്ക് വേണ്ടി മന്ത്രിയില്‍ നിന്നും ജെഴ്‌സി ഏറ്റുവാങ്ങി. എരുമപ്പെട്ടി ഗവ. ഹയര്‍ സെക്കന്‍ഡറി സ്‌കൂള്‍ ഗ്രൗണ്ടിലാണ് പരിശീലന ക്യാംപ് നടക്കുന്നത്. സ്‌കൂള്‍ പി.ടി.എ കമ്മിറ്റിയാണ് പത്ത് ദിവസങ്ങളായി നടന്ന് വരുന്ന ക്യാംപിന്റെ മുഴുവന്‍ ചെലവ് വഹിക്കുന്നത്. ഡിസമ്പര്‍ 10 മുതല്‍ 15 വരെയുള്ള ദിവസങ്ങളില്‍ കാശ്മീരിലാണ് മത്സരം നടക്കുന്നത്. അഞ്ചിന് ടീം കാശ്മീരിലേക്ക് യാത്ര തിരിക്കും.ബ്ലോക്ക് പഞ്ചായത്ത് പ്രസിഡന്റ് എസ്.ബസന്ത് ലാല്‍, പഞ്ചായത്ത് പ്രസിഡന്റ് മീന ശലമോന്‍, വൈസ് പ്രസിഡന്റ് കെ.ഗോവിന്ദന്‍കുട്ടി, സ്റ്റാന്‍ഡിങ് കമ്മിറ്റി ചെയര്‍മാന്‍ എന്‍.കെ കബീര്‍, പി.ടി.എ പ്രസിഡന്റ് കുഞ്ഞുമോന്‍ കരിയന്നൂര്‍, പ്രസ് ക്ലബ് പ്രസിഡന്റ് കബീര്‍ കടങ്ങോട് ആശംസയര്‍പ്പിച്ചു.
പരിശീലകരായ ആന്റണി ജോര്‍ജ്ജ്, പി. ദിലീപ്, ക്യാംപ് കോഡിനേറ്റര്‍ മുഹമ്മദ് ഹനീഫ മാസ്റ്റര്‍ എന്നിവരെ ചടങ്ങില്‍ ആദരിച്ചു. പ്രസ് ക്ലബ് കായിക താരങ്ങള്‍ക്ക് മധുരം വിതരണം ചെയ്തു. പ്രസ് ക്ലബ് ഭാരവാഹികളായ കെ.സി ഡേവിസ്, മാത്യു, റഷീദ് എരുമപ്പെട്ടി, മനോജ്, വേണു അമ്പലപ്പാട്ട് എന്നിവര്‍ നേതൃത്വം നല്‍കി.