പാനൂര്‍: പാറാട്ട് ബി.ജെ.പി നടത്തിയ പ്രതിഷേധ പ്രകടനത്തിന് നേരെ കല്ലേറ്. ഒരാള്‍ക്ക് പരിക്കേറ്റു. കല്ലെറിഞ്ഞത് സി.പി.എം പ്രവര്‍ത്തകരെന്ന് ബി.ജെ.പി നേതൃത്വം ആരോപിച്ചു.

ബി.ജെ.പി പ്രവര്‍ത്തകനായ കെ.പി വിനീഷി നാണ് (21) തലയ്ക്ക് പരിക്കേറ്റത്. ഇയാളെപാനൂര്‍ ഗവ:ആശുപത്രിയില്‍ പ്രവേശിപ്പിച്ചു. ഇന്നലെ രാത്രി എട്ടോടെയാണ് സംഭവം. ഞായറാഴ്ച രാത്രി കുന്നോത്തുപറമ്പില്‍ സി.പി.എം നടത്തിയ അക്രമത്തില്‍ പ്രതിഷേധിച്ചാണ് പ്രതിഷേധ പ്രകടനം നടത്തിയത്. പാറാട് കുന്നോത്തുപറമ്പ് റോഡിലെ സര്‍വിസ് സ്റ്റേഷന്‍ പരിസരത്ത് വച്ചാണ് കല്ലേറും അക്രമവുംനടന്നത്. പ്രകടനത്തോടൊപ്പം മൂന്നു വണ്ടി പൊലിസുമാണ്ടായിരുന്നു. പൊലിസ് ലാത്തി വീശിയാണ് സംഘര്‍ഷത്തില്‍ അയവു വരുത്തിയത്. കഴിഞ്ഞ ദിവസം കുന്നോത്തുപറമ്പില്‍ ഒരു കോണ്‍ഗ്രസ് പ്രവര്‍ത്തകനും മര്‍ദനമേറ്റിരുന്നു. കുന്നോത്തുപറമ്പിലെ വടക്കയില്‍ ബാലന്റെ മകന്‍ ഷിജിലിനാണ് മര്‍ദനമേറ്റത്. ഇയാളെ ആശുപത്രിയില്‍ പ്രവേശിപ്പിച്ചു .സി.പി.എമ്മുകാര്‍ മര്‍ദിച്ചതായാണ് പരാതി. ഇരു സംഭവങ്ങളിലും കൊളവല്ലുര്‍ പൊലിസ് കേസെടുത്തു.