കോഴിക്കോട്: ഡിസംബര്‍ 12ന് പരീക്ഷ നടക്കാനിരിക്കെ കാലിക്കറ്റ് യൂനിവേഴ്‌സിറ്റിയുടെ ഡിസ്റ്റന്‍സ് എജ്യുക്കേഷന് കീഴിലുള്ള ബി.എ മൂന്നാം സെമസ്റ്റര്‍ അറബിയുടെ സ്റ്റഡി മെറ്റീരിയല്‍സ് ഇതുവരെ വിതരണം ചെയ്തിട്ടല്ല. സ്റ്റഡി മെറ്റീരിയല്‍സ് ആവശ്യപ്പെട്ട് എത്തുന്ന വിദ്യാര്‍ഥികളോട് പുസ്തകം എപ്പോള്‍ തരാന്‍ കഴിയുമെന്ന് പോലും പറയാനാകുന്നില്ല.
ഓണ്‍ലൈന്‍ വഴി പഠിക്കാനാണ് സര്‍വകലാശാലാ അധികൃതരുടെ നിര്‍ദേശം. 1400 രൂപയാണ് ഡിസ്റ്റന്‍സ് എജ്യുക്കേഷന്‍ വഴി പരീക്ഷ എഴുതുന്ന വിദ്യാര്‍ഥികളില്‍ നിന്നും സ്റ്റഡി മെറ്റീരിയല്‍സിനും കോണ്‍ടാക്ട് ക്ലാസിനുമായി സര്‍വകലാശാലയുടെ വിദൂര വിദ്യാഭ്യാസ വിഭാഗം ഈടാക്കുന്നത്. ബി.എ മൂന്നാം സെമസ്റ്ററിലെ മറ്റ് എല്ലാ വിഷയത്തിന്റെയും സ്റ്റഡി മെറ്റീരിയലുകള്‍ വിതരണം ചെയ്തുവെങ്കിലും രണ്ടാം ഉപഭാഷയായ അറബിയുടെ പുസ്തകം ഇതുവരെ അച്ചടി പോലും ആരംഭിച്ചിട്ടില്ല.
പേജ് ഡിസൈന്‍ ചെയ്യുന്നവരെയൊക്കെ പിരിച്ചുവിട്ടിരിക്കുകയാണെന്നും അതിനാലാണ് അച്ചടി വൈകുന്നതെന്നുമാണ് ഇത് സംബന്ധിച്ച് അന്വേഷണം നടത്തിയ വിദ്യാര്‍ഥികളോട് വൈസ് ചാന്‍സലറുടെ ഓഫിസില്‍ നിന്നുള്ള മറുപടി.