കൊണ്ടോട്ടി: സംസ്ഥാന ഹജ്ജ് കമ്മിറ്റിക്ക് കീഴില്‍ ഹജ്ജിന് പോകുന്നവരുടെ മാനിഫെസ്റ്റോ ഈ ആഴ്ച പ്രസിദ്ധീകരിക്കും. തീര്‍ഥാടകരുടെ യാത്രാതിയതി, വിമാന സമയം എന്നിവ ഉള്‍ക്കൊള്ളുന്നതാണ് മാനിഫെസ്റ്റോ. 22 മുതലാണ് ഹജ്ജ് സര്‍വിസുകള്‍ ആരംഭിക്കുന്നത്. കേരളത്തിന് പുറമെ ലക്ഷദ്വീപ്, മാഹി എന്നിവടങ്ങളില്‍ നിന്നുള്ളവരും നെടുമ്പാശ്ശേരി വഴിയാണ് ഹജ്ജിനു പോകുന്നത്.

തീര്‍ഥാടകരുടെ പാസ്‌പോര്‍ട്ടും വിസയും അനുബന്ധ രേഖകളും 14ന് കൊച്ചിയിലെത്തും. ഹജ്ജ് വിസ സ്റ്റാമ്പിങ് നടപടികള്‍ പുരോഗമിച്ചു വരികയാണ്. കേരളത്തിലെ തീര്‍ഥാടകരുടെ രേഖകള്‍ ശേഖരിക്കാനായി സംസ്ഥാന ഹജ്ജ് കമ്മിറ്റി ജീവനക്കാര്‍ അടുത്ത ദിവസം മുംബൈയിലേക്ക് പോകും. തീര്‍ഥാടകര്‍ക്കുളള കുത്തിവയ്പ് താലൂക്ക്, ജില്ലാ ആശുപത്രികള്‍ കേന്ദ്രീകരിച്ച് നടന്നുവരുന്നുണ്ട്.