ചെറുവത്തൂര്‍: അനാദായകരമായ വിദ്യാലയങ്ങളിലെ നിയമനാംഗീകാരകാര്യത്തില്‍ പുതിയ നിര്‍ദേശം. മുഴുവന്‍ വേതനത്തിനും അര്‍ഹതയുണ്ടെങ്കില്‍ ബന്ധപ്പെട്ട വിദ്യാഭ്യാസ ഓഫിസര്‍മാര്‍ക്ക് തന്നെ പരിശോധിച്ച് നിയമനാംഗീകാരം നല്‍കാം.

അനാദായകരമായ വിദ്യാലയങ്ങളില്‍ 2011-12 അധ്യയനവര്‍ഷം മുതല്‍ ദിവസവേതനത്തില്‍ നിയമനം നടത്താമെന്നും നിശ്ചിത അനുപാതത്തില്‍ കുട്ടികളുണ്ടെങ്കില്‍ അത്തരം നിയമനങ്ങള്‍ പൊതുവിദ്യാഭ്യാസ ഡയറക്ടര്‍ പരിശോധിച്ച് ശമ്പളനിരക്കില്‍ അംഗീകരിച്ചു നല്‍കുമെന്നാണ് ജൂലൈ 30നു പുറത്തിറക്കിയ സര്‍ക്കുലറില്‍ വ്യക്തമാക്കിയിരുന്നത്. എന്നാല്‍ ഇത്തരത്തില്‍ നിയമനാംഗീകാരം പുനഃപരിശോധിക്കുന്നതിനു പൊതുവിദ്യാഭ്യാസ ഡയറക്ടറുടെ കാര്യാലയത്തില്‍ പ്രായോഗികബുദ്ധിമുട്ടുള്ളതായി പൊതുവിദ്യാഭ്യാസ ഡയറക്ടര്‍ വ്യക്തമാക്കിയിട്ടുണ്ട്.

അതിനാല്‍ എല്‍.പി, യു.പി  വിഭാഗങ്ങളിലെ ദിവസവേതനാടിസ്ഥാനത്തില്‍ നല്‍കിയിട്ടുള്ള നിയമനങ്ങള്‍ അതത് ജില്ലാ വിദ്യാഭ്യാസ ഓഫിസര്‍മാരും ഹൈസ്‌കൂള്‍ വിഭാഗം അധ്യാപകരുടെ നിയമനം വിദ്യാഭ്യാസ ഉപഡയറക്ടര്‍മാരും പരിശോധിക്കും. നിലവിലുള്ള ഉത്തരവുകളുടെയും ചട്ടങ്ങളുടെയും അടിസ്ഥാനത്തില്‍ അര്‍ഹതയുണ്ടെങ്കില്‍ നിയമനം മുഴുവന്‍ വേതനത്തിലും അംഗീകരിക്കും. അത്തരം നിയമനങ്ങള്‍ സൂപ്പര്‍ ചെക്ക് സെല്‍ ഓഫിസറുടെ നിശ്ചിത പരിശോധനയ്ക്കു വിധേയമാക്കണം.

കഴിഞ്ഞ അഞ്ചു വര്‍ഷമായി പ്രതിഫലമില്ലാതെ ജോലി ചെയ്യുന്ന അധ്യാപകര്‍ക്കുള്ള  നിയമനാംഗീകാര നടപടികള്‍ ലഘൂകരിക്കുന്നതിനു പുതിയ നിര്‍ദേശം കൊണ്ടു സാധിക്കും. ശരാശരി ഒരു ക്ലാസില്‍ 15 കുട്ടികളുള്ള വിദ്യാലയങ്ങളിലെ നിയമനങ്ങള്‍ മുഴുവന്‍ വേതനത്തിലും അംഗീകരിക്കാം എന്നുള്ളതാണു നിലവിലെ നിര്‍ദേശം.  പൊതുവിദ്യാഭ്യാസ വകുപ്പ് സ്‌പെഷല്‍ സെക്രട്ടറിയാണ് സര്‍ക്കുലര്‍ വഴി പുതിയ നിര്‍ദേശം നല്‍കിയിട്ടുള്ളത്.