റിയാദ്: സഊദിയുമായി ഇന്ത്യ പുതിയ ഹജ്ജ് കരാറിൽ ഒപ്പ് വെച്ചു. 2020 വർഷത്തെ ഹജ്ജ് കരാറിലാണ് ഇരു രാജ്യങ്ങളും തമ്മിൽ ഒപ്പ് വെച്ചത്. ഔദ്യോഗിക സന്ദർശത്തിനായി സഊദിയിലെത്തിയ ഇന്ത്യൻ ന്യൂനപക്ഷ കാര്യമന്ത്രി മുഖ്താർ അബ്ബാസ് നഖ്‌വിയും സഊദി ഹജ്ജ്, ഉംറ മന്ത്രി മുഹമ്മദ് സാലിഹ് ബന്ദനും തമ്മിലാണ് പുതിയ കരാറിൽ ഒപ്പു വെച്ചത്. എന്നാൽ, മുൻവർഷത്തെ കരാറിൽ നിന്നും കൂടുതൽ വ്യത്യസ്തമല്ല പുതിയ കരാർ.

      2020 കരാറിൽ ഇരു രാജ്യങ്ങളും തമ്മിൽ ഒപ്പ് വെച്ചെങ്കിലും തീർത്ഥാടക ക്വാട്ടയിൽ വർദ്ധനവില്ല. കഴിഞ്ഞ വർഷത്തെ ഇന്ത്യൻ ഹജ്ജ് ക്വാട്ടയായിരുന്ന രണ്ട് ലക്ഷം തീർഥാടകർ എന്നത് തന്നെയായിരിക്കും 2020 ലും തുടരുക. ഇന്ത്യയിൽ നിന്നുള്ള ഹാജിമാർക്കുള്ള സേവനങ്ങളും നടപടിക്രമങ്ങളും പൂർണ്ണമായും ഡിജിറ്റൽവൽക്കരിക്കുമെന്ന് മന്ത്രി മുഖ്താർ അബ്ബാസ് നഖ്‌വി അറിയിച്ചു. ഇന്ത്യയായിരിക്കും ഇത് ആദ്യം പൂർത്തീകരിക്കുന്നതെന്നും അദ്ദേഹം പറഞ്ഞു. ഇന്ത്യയിൽ നിന്നും ഹജ്ജിനെത്തുന്നവരുടെ എമിഗ്രേഷൻ നടപടികൾ ഇന്ത്യയിൽ തന്നെ നടത്തുന്നതിനുള്ള നടപടികൾ ഇരു രാജ്യങ്ങളും തമ്മിൽ സ്വീകരിച്ചു വരികയാണ്. അടുത്ത അഞ്ചു വരെയാണ് ഹജ്ജ് അപേക്ഷക്കുള്ള സമയമെങ്കിലും ഇത് നീട്ടുന്ന കാര്യം പരിഗണനയിലുണ്ട്. ഇതിനകം ഒരു ലക്ഷത്തി എൺപതിനായിരത്തിൽ പരം അപേക്ഷകളാണ് ലഭിച്ചത്. 

        ഈ വർഷം 22 എംബാർക്കേഷൻ പോയിന്റുകളിൽ നിന്നാണ് തീർത്ഥാടകർ എത്തിച്ചേരുക. വിജയവാഡയിലാണ് പുതിയ എംബാർകേഷൻ പോയന്റ് അനുവദിച്ചത്. അതേ സമയം, കണ്ണൂരിൽ പുതിയ ഹജ്ജ് എംബാർക്കേഷൻ പോയിൻ്റ് ഇപ്പോൾ പരിഗണനയിലില്ലെന്ന് മുഖ്താർ അബ്ബാസ് നഖ്‌വി അറിയിച്ചു. ജിദ്ദയിൽ മാധ്യമ പ്രവർത്തകരോട് സംസാരിക്കവെയാണ് മന്തി കണ്ണൂർ വിമാനത്താവളത്തിൽ ഹജ്ജ് എംബാർക്കേഷൻ പോയന്റ് നിലവിൽ പരിഗണയിൽ ഇല്ലെന്ന് മന്ത്രി വ്യക്തമാക്കിയത്. ഇതേ കുറിച്ചുള്ള ചോദ്യത്തിന് കണ്ണൂരിൽ നിന്നും കരിപ്പൂരിലേക്ക് എത്ര കിലോമീറ്റർ ഉണ്ടെന്ന മറു ചോദ്യമാണ് മന്ത്രി ഉയർത്തിയത്. കരിപ്പൂരിനെ വിഭജിച്ച് കണ്ണൂരിൽ പുതിയ ഹജ്ജ് എംബാർക്കേഷൻ പോയന്റ് അനുവദിക്കാനായി കണ്ണൂർ ലോബി കഠിന ശ്രമം നടത്തിയിരുന്നു. 

        നേരത്തെ, ജിദ്ദയിലെത്തിയ കേന്ദ്ര മന്ത്രിയെ ഇന്ത്യന്‍ അംബാസഡര്‍ ഡോ. ഔസാഫ് സഈദും ജിദ്ദ കോണ്‍സല്‍ ജനറല്‍ മുഹമ്മദ് നൂര്‍ റഹ് മാന്‍ ശൈഖും മന്ത്രിയെ സ്വീകരിച്ചു.