കണ്ണൂര്‍: കീഴല്ലൂര്‍ സഹകരണ ബാങ്കില്‍ വാച്ച്മാന്‍ നിയമനത്തില്‍ അഴിമതി നടന്നെന്ന ആരോപണം സംബന്ധിച്ച് വിജിലന്‍സ് അന്വേഷണം വേണമെന്ന് സി.പി.എം ജില്ലാ സെക്രട്ടറി പി. ജയരാജന്‍. നിയമനത്തിന് 25 ലക്ഷം രൂപയാണ് നല്‍കിയതെന്ന് ഡി.സി.സി അംഗം കൃഷ്ണകുമാര്‍ കാഞ്ഞിലേരിയാണ് ആരോപണം ഉന്നയിച്ചത്. കോണ്‍ഗ്രസ് ഭരിക്കുന്ന ബാങ്കില്‍ പണം വാങ്ങി നിയമിച്ചത് ബി.ജെ.പി പ്രവര്‍ത്തകനെയാണെന്നും കൃഷ്ണകുമാര്‍ ഫേസ്ബുക് പോസ്റ്റില്‍ ആരോപിക്കുന്നുണ്ടെന്നും പി. ജയരാജന്‍ പറഞ്ഞു. അഴിമതിയുടെ തെളിവാണ് നിയമനം റദ്ദ് ചെയ്യണമെന്നാവശ്യപ്പെട്ട് ഡി.സി.സി പ്രസിഡന്റ് നല്‍കിയ കത്ത്. 20 ലക്ഷം രൂപ നല്‍കി ബാക്കി 5 ലക്ഷം രൂപ നല്‍കാനുണ്ടെന്നുമാണ് വിവരം. ബാങ്കിലെ അഴിമതി സംബന്ധിച്ച് സമഗ്രമായ വിജിലന്‍സ് അന്വേഷണം ആവശ്യമാണെന്നും പി. ജയരാജന്‍ വാര്‍ത്താസമ്മേളനത്തില്‍ ആവശ്യപ്പെട്ടു.