തലശ്ശേരി: ഐ.എസ് ബന്ധം ആരോപിച്ച് എന്‍.ഐ.എ ജയിലിലടച്ച അറബി ഹംസയെ തലശ്ശേരിയിലെത്തിച്ചു. മൂന്ന് മണിക്കൂര്‍ ജാമ്യം അനുവദിച്ചതിനെ തുടര്‍ന്ന് കനത്ത പൊലിസ് സുരക്ഷയിലാണ് ഹംസയെ എത്തിച്ചത്. അസുഖ ബാധിതനായി ചിറക്കര കുഴിപ്പങ്ങാട്ടെ വീട്ടില്‍ കഴിയുന്ന ഭാര്യാപിതാവിനെ സന്ദര്‍ശിക്കാനാണ് എറണാകുളം എന്‍.ഐ.എ കോടതി ജാമ്യം അനുവദിച്ചത്. ഇന്നലെ ഉച്ചയോടെ ചിറക്കര കുഴിപ്പങ്ങാട്ടെ വീട്ടിലെത്തിയ ഹംസ മൂന്നു മണിക്കൂറോളം ചെലവഴിച്ചതിനു ശേഷം വൈകിട്ട് നാലോടെ എറണാകുളത്തേക്ക് തിരിച്ചു.
അറബി ഹംസ, മുണ്ടേരിമൊട്ട സ്വദേശികളായ റാഷിദ്, മിദ്‌ലാജ് എന്നിവരെ കഴിഞ്ഞ വര്‍ഷമാണ് ഐ.എസ് ബന്ധം ആരോപിച്ച് എന്‍.ഐ.എ അറസ്റ്റ് ചെയ്തത്. അറബി ഹംസയുടെ നേതൃത്വത്തില്‍ ഐ.എസ് റിക്രൂട്ട്‌മെന്റ് നടത്തിയതായുള്ള പരാതിയിലായിരുന്നു ഇവര്‍ക്കെതിരേ അന്വേഷണം നടത്തി അറസ്റ്റ് ചെയ്തത്. കേസിന്റെ കുറ്റപത്രം കൊച്ചി എന്‍.ഐ.എ കോടതിയില്‍ നേരത്തെ സമര്‍പ്പിച്ചിരുന്നു. തലശ്ശേരി സി.ഐ എം.പി ആസാദ്, എസ്.ഐ അനില്‍ കുമാര്‍, അഡീഷണല്‍ എസ്.ഐ കെ. സുനില്‍ കുമാര്‍ എന്നിവരുടെ നേതൃത്വത്തിലായിരുന്നു സുരക്ഷ ഒരുക്കിയത്.