കണ്ണൂര്‍: കണ്ണൂര്‍ നഗരത്തില്‍ വിവിധ ഇടങ്ങളിലെ ഓടകള്‍ തകര്‍ന്നത് യാത്രക്കാര്‍ക്ക് ദുരിതമാകുന്നു. 

എസ്.എന്‍ ടാക്കിസിന് മുന്‍വശം, കെ.എസ്.ആര്‍.ടി.സി ബസ് സ്റ്റാന്റിന് മുന്‍വശം, ഫോര്‍ട്ട് റോഡ് തുടങ്ങിയ വിവിധ ഇടങ്ങളിലാണ് ഓടകള്‍ തകര്‍ന്ന് യാത്രക്കാര്‍ക്ക് ദുരിതമാകുന്നത്. മഴക്കാലമായതോടെ വെള്ളവും മാലിന്യവും കാരണം അസഹ്യമായ ദുര്‍ഗന്ധമാണ് പ്രദേശത്തുകൂടെ കടന്നുപോകുന്ന യാത്രക്കാര്‍ക്ക് അനുഭവപ്പെടുന്നത്. കാലൊന്ന് തെറ്റിയാല്‍ വൃത്തിഹീനമായ ഓടയിലാണ് ആളുകള്‍ വീഴുക.
നഗരത്തിലെ റോഡിന് ഇരുവശങ്ങളിലുമുള്ള ഓടകളുടെ കോണ്‍ഗ്രീറ്റ് അടപ്പ് തകര്‍ന്നത് ഇതിന് മുന്‍പും വിവാദമായിരുന്നു. പ്രധാന പ്രദേശങ്ങള്‍ കോര്‍പ്പറേഷന്‍ ഇടപെട്ട് ശരിയാക്കിയെങ്കിലും മഴക്കാലമായതോടെ വീണ്ടും മറ്റ് പ്രദേശങ്ങളിലെ ഓടകളും തകരുകയായിരുന്നു.
മഴ പെയ്ത് റോഡ് കുളമാകുമ്പോള്‍ അടപ്പില്ലാത്ത ഓടകളിലൂടെ മലിന ജലവും പുറത്തെത്തും. ഓടകളിലെ തകര്‍ന്ന ഭാഗങ്ങളിലൂടെ വിവിധ കടകളിലെ ആളുകള്‍ മലിന വസ്തുക്കള്‍ ഓടയിലേക്ക് നിക്ഷേപിക്കുന്നതും പതിവാണ്.
ഇങ്ങനെ ഓടകളില്‍ നിക്ഷേപിക്കുന്ന മാലിന്യം കത്തിക്കുകയും ചെയ്യുന്നുണ്ട്. ഓടകള്‍ തകര്‍ന്നതും മലിന വസ്തുക്കള്‍ മഴവെള്ളത്തില്‍ പുറത്തുവരുന്നതിനും പരിഹാരം കാണമെന്നാണ് വഴിയാത്രക്കാരുടെ ആവശ്യം.