തിരൂരങ്ങാടി: അറവുശാലാ മാലിന്യങ്ങള്‍ ദേശീയ പാതയോരത്ത് തള്ളിയ നിലയില്‍. മൂന്നിയൂര്‍ വെളിമുക്ക് പാലക്കലിലാണ് അറവുശാലയിലെ മാലിന്യം സാമൂഹ്യ വിരുദ്ധര്‍ ചാക്കില്‍ക്കെട്ടി തള്ളിയ നിലയില്‍  ദേശീയപാതയോരത്ത് കണ്ടെത്തിയത്. തിങ്കളാഴ്ച്ച പുലര്‍ച്ചെയാണ് സംഭവം.
പോത്ത്, കോഴി എന്നിവയുടെ അവിഷ്ടങ്ങളാണ് നാല്‍പതിലേറെ ചാക്കുകളിലാക്കി തള്ളിയത് . ലോറിയില്‍ കയറ്റി കൊണ്ടുവന്ന് തള്ളിയതെന്നാണ് പ്രാഥമിക നിഗമനം.
പല കടകളില്‍ നിന്നായി ശേഖരിച്ച മാലിന്യങ്ങളാണിവയെന്ന് കരുതുന്നു.
ജനവാസകേന്ദ്രങ്ങളില്‍ മാലിന്യം തളളുന്നവര്‍ക്കെതിരേ കര്‍ശന നടപടി വേണമെന്നും നാട്ടുകാര്‍ ആവശ്യപ്പെട്ടു. പഞ്ചായത്ത് അധികൃതരും തിരൂരങ്ങാടി പൊലിസും സ്ഥലത്തെത്തി പരിശോധന നടത്തി. മറ്റൊരു സ്ഥലത്ത് മണ്ണുമാന്തിയന്ത്രമുപയോഗിച്ച് കുഴിയെടുത്ത് മാലിന്യങ്ങള്‍ മൂടി.