കൊല്ലം: എല്‍.ഡി.എഫിന്റെ പ്രകടനപത്രികയിലെ വാഗ്ദാനം പാലിക്കാത്തതിനെതിരേ സമരവുമായി സംസ്ഥാന സര്‍ക്കാരിനെതിരേ സമരവുമായി ഇടത് തൊഴിലാളി സംഘടന. കേരള കശുവണ്ടി തൊഴിലാളി കേന്ദ്രകൗണ്‍സിലിന്റെ (എ.ഐ.ടി.യുസി) നേതൃത്വത്തില്‍ കലക്ടറേറ്റ് മാര്‍ച്ച് നടത്തി. എ.ഐ.ടി.യുസി സംസ്ഥാന സെക്രട്ടറി കെ.പി രാജേന്ദ്രന്‍ മാര്‍ച്ച് ഉദ്ഘാടനം ചെയ്തു. പ്രകടനപത്രികയിലെ വാഗ്ദാനം ചെയ്ത പ്രകാരം പരമ്പരാഗത തൊഴില്‍മേഖലയെ സംരക്ഷിക്കാന്‍ സര്‍ക്കാര്‍ നടപടി സ്വീകരിക്കണമെന്നും പരമ്പരാഗത വ്യവസായങ്ങളെ സംരക്ഷിക്കാന്‍ സംസ്ഥാന ബജറ്റില്‍ 3000 കോടി രൂപയെങ്കിലും നീക്കിവയ്ക്കണമെന്നും അദ്ദേഹ ആവശ്യപ്പെട്ടു.
അടഞ്ഞുകിടക്കുന്ന സ്വകാര്യ ഫാക്ടറികള്‍ തുറന്നുപ്രവര്‍ത്തിപ്പിക്കാന്‍ കഴിയാത്തതും തൊഴിലാളികളുടെ തൊഴിലും കൂലിയും സംരക്ഷിക്കാനാവാത്തതും എല്‍ഡിഎഫ് ഭരണത്തിന്‍ കീഴില്‍ ഉണ്ടാകാന്‍ പാടില്ലാത്തതാണെന്ന് അദ്ദേഹം കൂട്ടിച്ചേര്‍ത്തു.
സ്വകാര്യ കശുവണ്ടി ഫാക്ടറികള്‍ തുറന്ന് പ്രവര്‍ത്തിപ്പിക്കുക, സ്റ്റാഫിന്റെ ശമ്പളം പരിഷ്‌ക്കരിക്കുക, ഗ്രാറ്റുവിറ്റി വിതരണം പൂര്‍ത്തിയാക്കുക, പെന്‍ഷന്‍ അപാകതകള്‍ പരിഹരിക്കുക തുടങ്ങിയ ആവശ്യങ്ങള്‍ ഉന്നയിച്ചായിരുന്നു സമരം.
കേന്ദ്രകൗണ്‍സില്‍ പ്രസിഡന്റ് എ ഫസലുദ്ദീന്‍ ഹക്ക് അധ്യക്ഷത വഹിച്ച യോഗത്തില്‍ സെക്രട്ടറി അഡ്വ. ജി ലാലു സംസാരിച്ചു. അഡ്വ. എന്‍ രാജന്‍, എ.ഐ.ടി.യു.സി ജില്ലാസെക്രട്ടറി ജി ബാബു എന്നിവര്‍ അഭിവാദ്യം ചെയ്തു.
സിപിഐ ജില്ലാസെക്രട്ടറി അഡ്വ. എന്‍ അനിരുദ്ധന്‍, അഡ്വ. സി.ജി. ഗോപുകൃഷ്ണന്‍, ആര്‍ മുരളീധരന്‍, മുളവന രാജേന്ദ്രന്‍, അയത്തില്‍ സോമന്‍, ഇ.എം റഷീദ് പ്രകടനത്തിന് നേതൃത്വം നല്‍കി.