എരുമപ്പെട്ടി: കടങ്ങോട് പഞ്ചായത്തില്‍ അര്‍ഹതപ്പെട്ടവര്‍ക്ക് പെന്‍ഷന്‍ ലഭിക്കുന്നില്ലെന്ന് പരാതി. പാവപ്പെട്ടവര്‍ക്ക് പെന്‍ഷന്‍ നിഷേധിക്കുന്ന നടപടിക്കെതിരേ പ്രക്ഷോഭവുമായി ഭരണകക്ഷിയായ സി.പി.ഐ രംഗത്തെത്തിയിരിക്കുകയാണ്.
പെന്‍ഷന്‍ ഗുണഭോക്താക്കളെ കണ്ടെത്താനുള്ള വിവരശേഖരണത്തില്‍ പറ്റിയ പിഴവുകളാണ് അര്‍ഹതപ്പെട്ടവര്‍ക്ക് ആനുകൂല്യം നഷ്ടപ്പെടാന്‍ ഇടയാക്കുന്നതെന്ന് സി.പി.ഐ ആരോപിക്കുന്നു. വാഹനം ഇല്ലാത്തവര്‍ക്ക് നാലുചക്ര വാഹനങ്ങള്‍ ഉണ്ടെന്ന് രേഖപ്പെടുത്തുകയും ജീവിച്ചിരിക്കുന്ന ഗുണഭോക്താക്കളെ മരിച്ചവരില്‍ ഉള്‍പ്പെടുത്തിയുമാണ് പട്ടിക തയാറാക്കിയിരിക്കുന്നത്.
വിവരശേഖരണത്തില്‍ സംഭവിച്ച ഇത്തരത്തിലുള്ള അപാകത മൂലം പഞ്ചായത്തില്‍ നൂറില്‍പരം ഗുണഭോക്താക്കള്‍ക്കാണ് പെന്‍ഷന്‍ ആനുകൂല്യം നഷ്ടപ്പെട്ടിരിക്കുന്നത്. പേരുകള്‍ രേഖപ്പെടുത്തുന്നതില്‍ വന്ന തെറ്റുകളും അര്‍ഹരായവരുടെ പെന്‍ഷന്‍ തടഞ്ഞുവെക്കാന്‍ കാരണമായിരിക്കുകയാണ്. അതേസമയം അനര്‍ഹരായ പലര്‍ക്കും പെന്‍ഷന്‍ ലഭിക്കുന്നുണ്ടെന്നും ആക്ഷേപമുണ്ട്.
പരാതികള്‍ ഉയര്‍ന്നതോടെ ഉടന്‍ തന്നെ അര്‍ഹരായവര്‍ക്ക് പെന്‍ഷന്‍ വിതരണം ചെയ്യുമെന്ന് സര്‍ക്കാര്‍ പ്രഖ്യാപിക്കുന്നുണ്ടെങ്കിലും ഇതുവരെയും നടപടിയായിട്ടില്ല. പെന്‍ഷന്‍ ലഭിക്കാതായതോടെ വിധവകളും വയോധികരും രോഗികളും ഉള്‍പ്പെടെയുള്ള ഗുണഭോക്താക്കള്‍ ബുദ്ധിമുട്ടിലായിരിക്കുകയാണ്. നിര്‍ധനരായവര്‍ക്ക് ലഭിക്കേണ്ട പെന്‍ഷന്‍ ഉടന്‍ വിതരണം ചെയ്യണമെന്ന് സി.പി.ഐ ആവശ്യപ്പെട്ടു. അല്ലാത്തപക്ഷം ശക്തമായ പ്രക്ഷോഭ പരിപാടികള്‍ ആരംഭിക്കുമെന്നും സി.പി.ഐ കടങ്ങോട് ലോക്കല്‍ കമ്മിറ്റി അറിയിച്ചു.
സത്താര്‍ പന്നിത്തടം അധ്യക്ഷനായ യോഗത്തില്‍ ടി.പി.ജോസഫ്, വി. പരമേശ്വരന്‍, സി.സി പവനന്‍, ഇ.എസ് മുരളി, ജയന്‍ചിറമനേങ്ങാട്, അഷറഫ് എന്നിവര്‍ സംസാരിച്ചു.