പാലക്കാട്: ആന്ധ്രാപ്രദേശില്‍ നിന്നും മലപ്പുറത്തേക്ക് കടത്തുകയായിരുന്ന രണ്ടുകിലോ കഞ്ചാവുമായി യുവാവിനെ പാലക്കാട് ടൗണ്‍ നോര്‍ത് പൊലീസ് അറസ്റ്റു ചെയ്തു. മലപ്പുറം, തിരൂരങ്ങാടി, ചന്തപ്പടി, പാറയില്‍ വീട്ടില്‍ മുഹമ്മദ് നസ്‌റുദ്ദീ(21) നെയാണ് ഒലവക്കോട്, താണാവില്‍വെച്ച് പാലക്കാട് ടൗണ്‍ നോര്‍ത് പൊലീസ് അറസ്റ്റു ചെയ്തത്. പിടിച്ചെടുത്ത കഞ്ചാവിന് കേരളത്തിലെ ചില്ലറ വിപണിയില്‍ ഒരു ലക്ഷത്തോളം രൂപ വില വരും. മലപ്പുറത്തെ ചില്ലറക്കച്ചവടക്കാര്‍ക്ക് നല്‍കാനാണ് കഞ്ചാവ് കൊണ്ടു വന്നത്. ആന്ധ്രയില്‍ 5000 രൂപക്ക് കിട്ടുന്ന ഒരു കിലോ ഉണക്ക കഞ്ചാവ് കേരളത്തിലെത്തിച്ച് ചില്ലറ വിപണിയില്‍ 50,000 രൂപക്കാണ് വില്‍ക്കുന്നത്. ചെറിയ പായ്ക്കറ്റിന് 500 രൂപയാണ് ഈടാക്കുന്നത്. മുഖ്യമായും സ്‌കൂള്‍, കോളജ് വിദ്യാര്‍ത്ഥികള്‍ , അന്യസംസ്ഥാന തൊഴിലാളികള്‍ എന്നിവരെ കേന്ദ്രീകരിച്ചാണ് കച്ചവടം നടക്കുന്നത്. കോടതിയില്‍ ഹാജരാക്കി റിമാന്‍ഡ് ചെയ്തു. പാലക്കാട് ജില്ലാ പൊലീസ് മേധാവി ദേബേഷ് കുമാര്‍ ബെഹ്‌റക്ക്് ലഭിച്ച രഹസ്യ വിവരത്തിന്റെ അടിസ്ഥാനത്തില്‍, പാലക്കാട് നര്‍കോട്ടിക്ക് സെല്‍ ഡി.വൈ.എസ്.പിഷംസുദ്ദീന്റെ നേതൃത്വത്തില്‍, പാലക്കാട് ടൗണ്‍ നോര്‍ത് ഇന്‍സ്‌പെക്ടര്‍ സി. അലവി, ആര്‍. രാജേഷ് , ശശിധരന്‍, .ജയമോഹന്‍, സുനില്‍, ഹിരോഷ്, സജീന്ദ്രന്‍,.അനില്‍ എന്നിവരടങ്ങിയ സംഘമാണ് കഞ്ചാവ് കടത്ത് പിടികൂടിയത്.