തൃശൂര്‍ : ആലത്തൂര്‍ പാര്‍ലിമെന്റ് മണ്ഡലത്തിലെ റോഡ് വികസനത്തിന് സെന്‍ട്രല്‍ റോഡ് ഫണ്ടില്‍ നിന്നും 23 കോടി രൂപയുടെ വികസന പ്രവര്‍ത്തനങ്ങള്‍ വേഗത്തില്‍ നടപ്പിലാക്കാന്‍ പൊതുമരാമത്ത് വകുപ്പധികൃതരുടേയും ജനപ്രതിനിധികളുടേയും യോഗം ഓഗസ്റ്റ് മാസത്തില്‍ വിളിച്ചു ചേര്‍ക്കുമെന്ന് പി.കെ ബിജു എം.പി അറിയിച്ചു.
നിര്‍മാണം സമയബന്ധിതമായി പൂര്‍ത്തിയാക്കുന്നതിനാണ് എം.പി യോഗം വിളിച്ച് ചേര്‍ക്കുന്നത്. ആലത്തൂര്‍ പാര്‍ലിമെന്റ് മണ്ഡലത്തില്‍ ഉള്‍പ്പെടുന്ന തൃശൂര്‍, പാലക്കാട് ജില്ലകളിലെ രണ്ട് റോഡുകളുടെ വികസനത്തിനായാണ് 23 കോടി രൂപ അനുവദിച്ചിട്ടുളളത്.
തൃശൂര്‍ ജില്ലയിലെ പാറേമ്പാടം കുരിശ് സ്റ്റോപ്പ് മുതല്‍ ആറ്റുപ്പുറം സെന്ററില്‍ സ്റ്റേറ്റ് ഹൈവേ62 ല്‍ ചേരുന്ന റോഡിന് 13 കോടി രൂപയും പാലക്കാട് ജില്ലയില്‍ കുഴല്‍മന്ദം മുതല്‍ കൊടുവായൂര്‍ വരെയുള്ളറോഡിന് 10 കോടി രൂപയുമാണ് വകയിരുത്തിയിട്ടുളളത്.
സെന്‍ട്രല്‍ റോഡ് ഫണ്ടില്‍ നിന്നും അനുവദിച്ച തുകയുപയോഗിച്ച് പാറേമ്പാടം കുരിശ് സ്റ്റോപ്പ് മുതല്‍ ആറ്റുപ്പുറം സെന്റര്‍ വരെയുളള 13 കിലോമീറ്റര്‍ റോഡിന്റെ വീതി കൂട്ടല്‍, കാന നിര്‍മാണം, റോഡ് സുരക്ഷാ മാനദണ്ഡങ്ങള്‍ നടപ്പിലാക്കും വിധം എം.പിയുടെ നിര്‍ദേശപ്രകാരമാണ് എസ്റ്റിമേറ്റ് തയ്യാറാക്കിയിട്ടുളളത്.
ഓരോ ഘട്ടത്തിലും പൊതുമരാമത്ത് വകുപ്പിന് കീഴിലുളള ദേശീയപാത വിഭാഗം ഉദ്യോഗസ്ഥര്‍ എം.പിയുമായി ബന്ധപ്പെട്ടിരുന്നു. നാലു പഞ്ചായത്തുകളിലെ കോള്‍ മേഖലകളിലൂടെ കടന്നു പോകുന്ന പ്രസ്തുത റോഡിന്റെ വികസനം നടപ്പാക്കുന്നതോടെ അടിസ്ഥാന സൗകര്യത്തോടൊപ്പം കാര്‍ഷിക മേഖലയിലെ വികസനം കൂടി യാഥാര്‍ത്ഥ്യമാകുമെന്നതാണ് പ്രത്യേകത.
ദേശീയപാത നിര്‍മാണത്തിന്റെ നിലവാരം ഉറപ്പാക്കുന്നതിനാവശ്യമായ തുകയും മൂന്ന് വര്‍ഷത്തെ റോഡ് പുനരുദ്ധാരണത്തിനാവശ്യമായ തുകയും കൂടി ഇപ്പോള്‍ വകയിരുത്തിയിട്ടുണ്ട്. സാങ്കേതികാനുമതിയും ടെണ്ടര്‍ നടപടി ക്രമങ്ങളും ഇതിനകം പൂര്‍ത്തിയാക്കിയിട്ടുണ്ട്.
കഴിഞ്ഞ ലോകസഭാ കാലയളവില്‍ ആലത്തൂര്‍ പാര്‍ലിമെന്റ് മണ്ഡലത്തില്‍ നിന്നും പതിനൊന്ന് റോഡുകള്‍ സെന്‍ട്രല്‍ റോഡ് ഫണ്ട് പദ്ധതിയില്‍ ഉള്‍പ്പെടുത്തിയിരുന്നു. കൂടാതെ എം.പി ഇടപെട്ടതനുസരിച്ച് ഗ്രാമീണ റോഡുകളുടെ വികസനത്തിന് പി.എം.ജി.എസ്.വൈ പദ്ധതിയില്‍ ഉള്‍പെടുത്തി 62.41 കോടി രൂപയും കേന്ദ്രസര്‍ക്കാരില്‍ നിന്നും ആലത്തൂര്‍ പാര്‍ലിമെന്റ് മണ്ഡലത്തിലേക്ക് അനുവദിച്ചിരുന്നു.
പുതിയതായി നിര്‍മാണം ആരംഭിച്ച അഞ്ചു പുതിയ പി.എം.ജി.എസ്.വൈ റോഡുകളുടെ നിര്‍മാണ പുരോഗതി വിലയിരുത്തുന്ന യോഗവും ഉടന്‍ വിളിച്ചു ചേര്‍ക്കുമെന്നും എം.പി അറിയിച്ചു.