കണിയാമ്പറ്റ: ചീക്കല്ലൂര്‍ ഗ്രാമരശ്മി ആര്‍ട്‌സ് ആന്റ് സ്‌പോട്‌സ് ക്ലബ്ബിന്റെ ആഭിമുഖ്യത്തില്‍ ചീക്കല്ലൂര്‍ വയലില്‍ പ്രത്യേകം സജ്ജമാക്കിയ ഗ്രൗണ്ടില്‍ പ്രാദേശിക ടീമുകളെ അണിനിരത്തികൊണ്ട് മഡ് ഫുട്‌ബോള്‍ മത്സരം സംഘടിപ്പിച്ചു. തുടക്കം മുതല്‍ അവസാനം വരെ ആവേശം അലയടിച്ച മത്സരത്തില്‍ നിരവധി ടീമുകളാണ് പങ്കെടുത്തത്. മത്സര സമയത്ത് മഴ വിട്ടുനിന്നതൊഴിച്ചാല്‍ ബാക്കി മഡ് ഫുട്‌ബോളിന്റെ എല്ലാ സൗന്ദര്യവും കാണികള്‍ ശരിക്കും ആസ്വദിച്ചു. മഡ്ഫുട്‌ബോളിന് ആവേശം പകര്‍ന്ന് സാംബ നാസിക് ഡോളിന്റെ കലാകാരന്‍മാരും ഒത്ത് ചോര്‍ന്നപ്പോള്‍ കളി ആരാധകരില്‍ കൂടുതല്‍ ആവേശം നിറച്ചു. ആവേശം വിതച്ച മത്സരത്തിന്റെ ഫൈനലില്‍ ചീക്കല്ലൂര്‍ സുബിന്‍ ആന്റ് ടീമിനെ പരാജയപ്പെടുത്തി സി.ആര്‍ സെവന്‍ ചാംപ്യന്‍മാരായി. മൂന്നാം സ്ഥാനം പോര്‍ച്ചുഗല്‍ ഫാന്‍സിനാണ്. വിജയികള്‍ക്കുള്ള ട്രോഫികള്‍ സണ്ണിഡാനിയേല്‍ വിതരണം ചെയ്തു. മികച്ചതാരമായി അഖില്‍ ജേക്കബിനെ തെരഞ്ഞെടുത്തു.