കണ്ണൂര്‍: വിമാനത്താവളത്തില്‍ ഉദ്ഘാടന ദിനം പതിനഞ്ചോളം വിമാനങ്ങളുണ്ടാകും. ദുബൈയിലേക്കുള്ള ആദ്യ സര്‍വിസ് നടത്തുന്ന എയര്‍ ഇന്ത്യ എക്‌സ്പ്രസ് വിമാനത്തിന് പുറമെ, മുതിര്‍ന്ന ഉദ്യോഗസ്ഥര്‍, കിയാല്‍ ഡയരക്ടര്‍മാര്‍ തുടങ്ങിയവര്‍ എത്തുന്ന വിമാനങ്ങളാണ് ഇവിടെയുണ്ടാവുക. കൂടാതെ ഇന്ത്യന്‍ വ്യോമസേന, ഇന്ത്യന്‍ നാവിക സേന എന്നിവയുടെ വിമാനങ്ങളുമുണ്ടാകും. ഉച്ചക്ക് 12.20ഓടെ ബംഗളൂരുവില്‍നിന്ന് തിരുവനന്തപുരത്തേക്ക് പോവുന്ന ഗോ എയര്‍ വിമാനവും കണ്ണൂര്‍ വിമാനത്താവളത്തില്‍ യാത്രക്കാരുമായെത്തും. ഉദ്ഘാടന ചടങ്ങിനെത്തുന്ന വിശിഷ്ടാതിഥികള്‍ ഉള്‍പ്പെടെയുള്ള യാത്രക്കാരെയും വഹിച്ച് വൈകിട്ട് മൂന്നിനാണ് ഈ വിമാനം തിരുവനന്തപുരത്തേക്ക് തിരിക്കുക. കണ്ണൂര്‍ അന്താരാഷ്ട്ര വിമാനത്താവളത്തിന്റെ മനോഹരമായ ഏപ്രണില്‍ ഇത്രയേറെ വിമാനങ്ങള്‍ ഒന്നിച്ച് നിര്‍ത്തിയിട്ടിരിക്കുന്നത് കൗതുകകരമായ കാഴ്ചയാവും.