കരാക്കസ്: വെനസ്വലയില്‍ പൊലിസ് രണ്ട് പ്രതിപക്ഷ നേതാക്കളെ തടവിലാക്കി. ഇന്നലെ രാവിലെ അവരുടെ വീടുകളില്‍ നിന്നാണ് പ്രതിപക്ഷ നേതാക്കളെ കസ്റ്റഡിയിലെടുത്തത്.
ലിയോപ്പോള്‍ഡോ ലോപ്പസ്, അന്റോണിയോ ലെഡസ്മ എന്നിവരാണ് തടവിലായ നേതാക്കള്‍. കരാക്കസില്‍ നിന്നുള്ള ലിയേപ്പോള്‍ഡോ ലോപ്പസ് മുന്‍ മേയറാണ്. നീണ്ട 13 വര്‍ഷത്തെ ജയില്‍ വാസത്തിനു ശേഷം ജൂലൈയിലാണ് ഇദ്ദേഹത്തെ വിട്ടയക്കുന്നത്.
അറസ്റ്റിലായ അന്റോണിയോ ലെഡസ്മയും മുന്‍ മേയറാണ്. വെനസ്വലയില്‍ പുതിയ ഭരണത്തിനായുള്ള തെരഞ്ഞെടുപ്പ് നടന്ന് രണ്ടു ദിവസത്തിനകമാണ് ഈ നേതാക്കളെ ജയിലിലാക്കുന്നതെന്നത് ശ്രദ്ധേയമാണ്. പ്രസിഡന്റ് നിക്കോളാസ് മദുറോയാണ് അറസ്റ്റിന് പച്ചക്കൊടി കാട്ടിയതെന്നാണ് വിവരം.