ന്യൂയോര്‍ക്ക്: പുലിറ്റ്‌സര്‍ പുരസ്‌കാര ജേതാവും നടനുമായ സാം ഷെപ്പേര്‍ഡ് അന്തരിച്ചു. 73 വയസായിരുന്നു. കെന്റക്കിയിലെ വസതിയില്‍ തിങ്കളാഴ്ചയായിരുന്നു അന്ത്യം. 1943 നവംബര്‍ അഞ്ചിനായിരുന്നു ജനനം. അമേരിക്കന്‍ കുടുംബജീവിതങ്ങളുടെ ഇരുണ്ടവശങ്ങള്‍ ചൂണ്ടിക്കാട്ടിയ എഴുത്തുകാരനായിരുന്നു സാം ഷെപ്പേര്‍ഡ്. ട്രൂ വെസ്റ്റ്, ഫൂള്‍ ഫോര്‍ ലവ്, ബറീഡ് ചൈല്‍ഡ് എന്നിവയാണ് അദ്ദേഹത്തിന്റെ പ്രധാന നാടകങ്ങള്‍. 1978ല്‍ പ്രസിദ്ധീകരിച്ച ബറീഡ് ചൈല്‍ഡിനാണ് പുലിറ്റ്‌സര്‍ പുരസ്‌കാരം ലഭിച്ചത്.
സത്യത്തെ ഒരു മരീചികയായാണ് അദ്ദേഹം തന്റെ നാടകങ്ങളില്‍ അവതരിപ്പിച്ചത്. 55ലധികം നാടകങ്ങള്‍ രചിച്ചിട്ടുണ്ട്.
ഹോളിവുഡിലെ സുവര്‍ണ കാലഘട്ടത്തിന്റെ പ്രതിനിധി കൂടിയായിരുന്നു ഷെപ്പേര്‍ഡ്. ഡെയ്‌സ് ഓഫ് ഹെവന്‍, ദ റൈറ്റ് സ്റ്റഫ്, ബെബി ബൂം എന്നിവയാണ് ഷെപ്പേര്‍ഡ് അഭിനയിച്ച പ്രധാന ചിത്രങ്ങള്‍. 50ലധികം ചലച്ചിത്രങ്ങളില്‍ അദ്ദേഹം അഭിനയിച്ചു.
ടെലിവിഷന്‍ സീരിയലുകളിലും അഭിനയിച്ചിട്ടുണ്ട്. നിരവധി ഗദ്യരചനകളും അദ്ദേഹത്തിന്റേതായുണ്ട്. ഒരിക്കലും ഒരു വാണിജ്യ എഴുത്തുകാരനായിരുന്നില്ല എന്നതാണ് സാം ഷെപ്പേര്‍ഡിനെ വേറിട്ടുനിര്‍ത്തുന്നത്.