കോട്ടക്കല്‍: സ്‌കൂള്‍ വിദ്യാര്‍ഥികള്‍ക്ക് വിതരണം ചെയ്യാനായി കഞ്ചാവുമായെത്തിയ രണ്ട് ബംഗാള്‍ സ്വദേശികളെ കോട്ടക്കല്‍ പൊലിസ് പിടികൂടി. ബംഗാള്‍ ഹൗറയിലെ ശൂബ് ദീബ് സര്‍ക്കാര്‍ (19), സൗമിക് മിത്ര (19) എന്നിവരെയാണ് എസ്.ഐ ആര്‍ വിനോദ് അറസ്റ്റ് ചെയ്തത്. ഇവരുടെ കൈവശം 525 ഗ്രാം കഞ്ചാവുണ്ടായിരുന്നു.
ഗവ.രാജാസ് ഹയര്‍സെക്കന്‍ഡറി സ്‌കൂള്‍ പരിസരത്തുനിന്നാണ് പ്രതികളെ പൊലിസ് പിടിച്ചത്. ചെറിയ പാക്കറ്റുകളാക്കി 300ഉം 400ഉംരൂപക്കാണ് ഇവര്‍ കുട്ടികള്‍ക്ക് കഞ്ചാവ് വില്‍പന നടത്തുന്നത്. ആറ് മാസം മുന്‍പേ കേരളത്തിലെത്തിയ ഇവര്‍ പുതുപ്പറമ്പിലെ കഞ്ചാവ് ചുടലപ്പറമ്പിലുള്ള വിതരണക്കാര്‍ക്കെത്തിക്കലായിരുന്നു. കഴിഞ്ഞ ദിവസം  ഇടനിലക്കാരെ ഒഴിവാക്കി നേരിട്ടു വിതരണത്തിനെത്തിയപ്പോഴാണ് പിടിയിലായത്.
കോട്ടക്കലിലും രാജാസ് സ്‌കൂള്‍ പരിസരത്തും വിദ്യാര്‍ഥികള്‍ക്ക് കഞ്ചാവ് വില്‍പന നടത്തുന്ന സംഘം വ്യാപകമാണെന്ന് സുപ്രഭാതം നേരത്തെ റിപ്പോര്‍ട്ട് ചെയ്തിരുന്നു.