പാലക്കാട്: കാടിനകത്തുനിന്നും മലമ്പുഴയില്‍ ഇറങ്ങുന്ന കാട്ടാനയെ ജനങ്ങള്‍ ശല്യം ചെയ്യുന്നത് പതിവായി. കഴിഞ്ഞ രണ്ടു ദിവസമായി മലമ്പുഴയിലും പരിസരത്തുമായി കറങ്ങുന്ന ആനയെ കല്ലെറിഞ്ഞും, മറ്റും ശല്യം ചെയ്യുമ്പോഴാണ് ആന ആളുകളെ ഓടിക്കുന്നത്. ചിലര്‍ മൊബൈലില്‍ വീഡിയോ, ഫോട്ടോ എടുത്തും നവമാധ്യമങ്ങളില്‍ പോസ്റ്റ് ചെയ്യാന്‍ വേണ്ടി ആനയുടെ സമീപം വരെയെത്തിയാണ് ഫോട്ടോ എടുക്കുന്നത്.
ബുധനാഴ്ച്ച കെ.ടി.ഡി.സി ഹോട്ടലിനു സമീപം വന്ന ആന ചെക്ക് ഡാമില്‍ കുളിച്ചതിനു ശേഷം മലമ്പുഴ ബസ് സ്റ്റാന്‍ഡിനടുത്തുവരെ എത്തിയ ആന വാഹനങ്ങള്‍ക്ക് പോകാന്‍ റോഡരികത്തേക്ക് മാറി കൊടുത്തിട്ടും കൂക്കിവിളിയും മറ്റുമായി ജനങ്ങള്‍ സമീപത്തു എത്തിയതോടെ ആന ശബ്ദമുണ്ടാക്കുകയും കുറെ നേരം കഴിഞ്ഞ് കൃഷി ഫാമിനകത്തേക്ക് പോകുകയുമാണുണ്ടായത്. ആന പുറത്തേക്കിറങ്ങുമ്പോള്‍ പിന്നാലെയെത്തി ജനങ്ങള്‍ ശല്യം ചെയ്യുന്നത് വനംവകുപ്പ് ഉദ്യോഗസ്ഥര്‍ നിയന്ത്രിക്കാനും തയാറാവുന്നില്ലെന്ന പരാതിയുമുണ്ട്.